KL

DK

ISUMAGINNITTUUTINNERNUT MINISTEREQARFIK

Tarnip pissusaanik misissuutit atorunnaarput suliallu suliarineqaqqissapput

Keira Alexander Kronvold kalaallillu angajoqqaat allat arlallit Danmarkimi angajoqqaat piginnaaneri pillugit misissuinermi tarnip pissusaanik misissuutit tunngavigalugit meeqqaminnik pinngitsaalillugit arsaarneqarnikuupput. Suliallu taakkununnga tunngasut suliarineqaqqittussanngorput. – Ulloq pilluarnarpoq, Folketingimut ilaasortaq oqarpoq.

Trine Juncher Jørgensen
TUSAGASSIORTOQ / JOURNALIST
Saqqummersinneqarpoq

Isumaginninnermut ineqarnermut ministerip Sophie Hæstorp Andersenip Danmarkimi angajoqqaatut piginnaasanik misissuinerit isornartorsiorneqartut tunngavigalugit kalaallit ilaqutariit meeqqaminnik pinngitsaaliisaallutik arsaagaasimasut ikiorsinnaanagit sapaatip-akunnerani kingullermi isumasioqatigiinnermi oqaatigaa.

Maannali isumalluarnartumik allatut nalunaarutiginnittoqarpoq.

Isumaginninnermut ineqarnermut ministeriaqarfimmit Naalakkersuisut isumaqatigalugit ilaqutariinnut kalaallinut meeqqanut tunngatillugu tarnip pissusaanik misissuinerit atorunnaarsinneqarnissasut nalunaarutigineqarpoq.

Immikkoortortaqarfik immikkut ittoq kalaallit oqaasiinik kulturiannillu paasisimasaqarluartut kommunit meeqqanik ilaqutariinni kalaallini peroriartortunik isumaginninnermut tunngasunik suliaqarneranni ikiortalissavaat.

Angerlarsimaffiup avataanut inissiinermut suliat misissorneqassapput

Kommunit ilaqutariinnut kalaallinut meerartalinnut suliani angajoqqaat piginnaasaat nalililersorneranni tarnip pissussaanik misissuutit nalinginnaasumik atorneqartartut atornagit immikkut ittumik immikkoortortaqarfimmit atuisussanngorlugit pisussaaffilerneqarnissaat anguniarlugu qallunaat naalakkersuisui inatsisissatut siunnersuuteqarniarput.

Meeqqanut nalilersuinermi aamma taamaassaaq. Immikkoortortaqarfiup immikkut ittup naliliinera kommunit paasissutissaataanut ilanngunneqassaaq, misissortinnerup inernera pinnagu.

Tarnip pissusaanut misissuinerit nalinginnaasut atorlugit angerlarsimaffiup avataanut inissiinermi suliat immikkoortortaqarfiup immikkut ittup aamma misissussavai. Misissuinerit atorlugit naliliineq tamarmiunngitsutut kukkusumik naliliinerusimasoq immikkoortortaqarfiup nalilerpagu suliamik suliareqqiinissaq siunertaralugu kommuni suliamik suliarinnittoq attaveqarfigneqassaaq.

Politikeri: Ulloq pilluarnarpoq

- Ulloq pilluarnarpoq, nuannaarpallaarnaveersaarpungali. Allakkatigut takoqqaarusuppara, aammalju inatsisissatut siunnersuut saqqummiunneqareerpat isornartorsiorsinnaarusuppara. Eqqortumilli alloriarneruvoq, Folketingimut ilaasortaq Aaja Chemnitz (IA) Sermitsiamut oqarpoq.

Inatsisissatut siunnersuut piaarnerpaamik saqqummiunneqassaaq, kingusinnerpaamillu maaji aallaqqaataani 2025-mi atuutilersinneqassalluni.

samfund psykologiske tests sophie hæstorp andersen aaja chemnitz grønlandske familier inuiaqatigiit naalakkersuisut

ATORFIIT Se alle jobs

Powered by Labrador CMS