Tasiilami erngup nukinga atorlugu nukissiorfimmik annertusineq unitsinneqarallartoq
Naalakkersuisut taamatut aalajangerput suliassamut aningaasartuutissat katillutik naatsorsuutigisamit qaffasinnerujussuummata aamma ullumikkut pisinnaasat Tasiilami pisariaqartitsineq killissinnaammassuk aamma pisariaqartitsineq annerulissagaluarpat, Naalakkersuisut nassuiaapput.
- Suliassaq ingerlatiinnaraluarutsigu tamatuma kinguneranik akinik qaffaaneq innuttaasunut tuttussaq pissagaluarpoq, tamannalu maanna innaallagissamik pisariaqartitsineq pisariaqartitsinerulernissarlu eqqarsaatigalugit illersorneqarsinnaanngilaq, Naaja H. Nathanielsen (IA) ilaatigut tunngavilersuivoq.
Assiliisoq: Naalakkersuisut
Inatsisartut upernaakkut ataatsimiinneranni 2022 Lars Poulsen (S) aammalu Harald Bianco & Knud Mathiassen (IA) siunnersuuteqarput inatsiartut aalajangiissasut Tasiilami erngup nukinga atorlugu nukissiorfiup annertusineqarnissaa pillugu. Taakku isumaqaramik annertusaaneq pisariaqartoq illoqarfiup ineriartornissaanut, pingaartumik inuussutissarsiornermut aammalu nukissiuutinik ataavartumik pilersuinissamut.
Taamanikkut Naalakkersuisut inuiaqatigiinnut aningaasaqarnikkut sunniutaasinnaasut nalilersorneqarnissaat peqqaassasoq kissaatigaat aalajangiinissaq sioqqullugu.
Taamaattorli Inatsisartut siunnersuutit siuarsarpaat, taamaalillunilu aalajangiunneqarpoq annertusaaneq sulissutigineqassasoq siunnersuutillu inatsiartuni sanaartornermut ataatsimiititaliamut ingerlateqqinneqarput.
Tamatuma kingorna aamma sanaartorfissaq pillugu pilersaarusiornermut siunnersuummik Kommuneqarfik Sermersooq suliaqarpoq annertusineq periarfissinniarlugu.
Akisuallaartoq
Lars Poulsenip pakatsissutigeqisaanik Naalakkersuisut marlunngornermi ullaakkut nalunaarutigaat tusagassiorfinnut nalunaaruteqarnikkut annertusineq maanna unitsinneqarallassasoq:
- 2023-mi Tasiilami erngup nukinganik nukissiorfiup allineqarnissaa aalajangiunneqarmat naatsorsuutigineqarsimavoq piffissap ingerlanerani pilersuinermi uuliamik pisisarneq sipaarutigineqalerumaartoq, illoqarfiup annersaata erngup nukinganik nukissiorfimmit pilersorneqarnissaa pisariaqartinneqarpat. Taamanikkut inuiaqatigiit aningaasaqarnerannik misissuinerup takutippaa suliassaq imminut akilersinnaassasoq.
- Pissutsilli allanngorsimapput. Suliassaq malunnaatilimmik akitsoriarsimaqaaq taamalu imminut akilersinnaajunnaarluni. Tamatuma saniatigut misissuinerup takutippaa maanna pilersuisinnaassutsip illoqarfiup pisariaqartitaa kiisalu illoqarfimmi suliassat annertunerulernissaat, soorlu inissiat amerlanerulerlupata aamma inuussutissarsiorneq suliffissaqartitsinerulerpat, killissinnaagai, Naalakkersuisut nalunaarput, taakkuli ilisimatitsissutiginngilaat qanoq annertutigisumik "malunnaatilimmik" akitsoriarsimanersoq.
Akit qaffakkiartornissaat aarlerinaateqartoq
- Ugguaraakka suliassamut aningaasartuutissat qaffasinneri akuersaarparali maanna suliassaq ingerlaqqissinnaanngimmat – pingaartumik aningaasaqarniarnikkut unamminartorsiornerujussuup atuuttup nalaani.
- Suliassaq ingerlatiinnaraluarutsigu tamatuma kinguneranik akinik qaffaaneq innuttaasunut tuttussaq pissagaluarpoq, tamannalu maanna innaallagissamik pisariaqartitsineq pisariaqartitsinerulernissarlu eqqarsaatigalugit illersorneqarsinnaanngilaq. Naalakkersuisut ineriartorneq malinnaaffigissavaat ataavartumillu naliliiffigisassallugu nukissamik pisariaqartitsinerulerneq ineriartortitsinissaagaluamik pakkersimaartitsinersoq. Pisariaqassappat dieselimik atuineq piaartumik qaffassinnaassavarput, nukissiuutinut Naalakkersuisoq, Naaja H. Nathanielsen oqarpoq.
Suliniut siusinnerusukkut naatsorsuinerni 40-55 millionit koruuninik akeqassangatinneqarnikuuvoq.
Pinngitsoorani pisariaqartinneqanngilaq
Naaja. H. Nathanielsenip maluginiarpaa Tasiilami innaallagissamik pilersuinermut allissutissaq pisariaqanngitsoq, maanna innaallagissamik pilersuineq Tasiilami pisariaqartinneqartumut naapertuummat, maanna siunissamilu.
- Naalakkersuisut tapersersorpaat inuiaqatigiit kalaallit piujuaannartitsinissamik tunngaveqarlutik ingerlanissaannik kissaateqarneq, aningaasaqarniarnerli maannakkutut itsillugu suliassat silaannaap pissusaanut naapertuunnerpaasut aningaasaliiffigineqarnissaat pingaartinneqarpoq.
Naggataatigut Naalakkersuisut erseqqissaatigaat siunissami Tasiilami nukissiutitigut pisariaqartitsineq qaffariassagaluarpat oqaluuserisaq uterfigeqqinneqarumaartoq.
