KL

DK

Tasiilami meeqqat pillugit suliniut aningaasaqarnikkut unammilligassaqartoq

Tasiilami suliniut meeqqat inuusuttullu inuuniarnermi atugarissaarnissaannik tunngassuteqartoq aningaasatigut ajornartorsiorujussuartoq illoqarfiit pingaarnersaata kommuniani aningaasaqarnermut ataatsimiititaliami politikerinut saqqummiussami allassimavoq.

Sustainable Now-ip Tasiilami Tsuleralingiippuu Tasiilaq-distriktimi suliniutaa, ukiuni tulliuttuni pingasuni naammassiniarlugu aningaasaliissutit amerlanerusut qinnutigineqarput.
Tusagassiortoq
Saqqummersinneqarpoq

Suliniaqatigiiffiup Naalakkersuisunut attuumassuteqanngitsup Sustainable Now-ip suliniut siunnersortinit ingerlanneqartoq, Tasiilami Tsuleralingiippuu, ukiumut 1,5 millionit koruuninik kommunimit aningaasaliiffigineqartoq 2020-miilli ingerlappaat. Sustainable Now-illi suliniutigineqartup 2028-mut naammassissaguniuk aningaasanik amerlanerujussuarnik maanna piumasaqarpoq.

Suliniummi ukiuni arfineq-pingasuni ingerlanneqartumi Tasiilami nunaqarfiinilu inuiaqatigiinni ineriartorneq pitsaasoq ataavartorlu pilersinnissaa siunertarineqarpoq, tassani innuttaasut kissaataat pisariaqartitaallu aallaavigineqarlutik innuttaasullu peqataatinneqarlutik.

Aningaasaliissutit amerlineqarsinnaanerat

Aningaasartuutit naatsorsuutiginngisat annertunerulerpata imaluunniit naatsorsuutit annertusippata, suliniutilluunniit imarisaat allanngorpata missingersuutit allakkatigut isumaqatigiissusiornikkut nalimmassarneqarsinnaanerat periarfissaasoq Kommuneqarfik Sermersuup Sustainable Now-illu 2019-imi isumaqatigiissutaanni allassimavoq, tamanna aningaasaqarnermut ataatsimiititaliami politikerinut saqqummiunneqartumi ilisimatitsissutigineqarpoq.

- Sustainable Now kissaatigaa missingersuutinik iluarsartuussisoqassasoq amerliliisoqassasorlu, taakku nalilermassuk aningaasaqarneq suliniutillu imminnut attanneqarsinnaasumik ataqatigiikkunnaarsimasut, kommunini atorfillit qullersaat Ole Jakobsen nassuiaavoq.

Suliniaqatigiiffik ukiunut tulliuttunut pingasunut aningaasanik amerlanerujussuarneq piumasaqarpoq.

Ukiuni tallimani kingullerni ukiumut 1,5 millionit koruuninik aningaasaliiffigineqartaraluarlutik maanna 2.419.700 koruuninik aningaasaliiffigineqarnissamik piumasaqarput — 61 procentimik qaffaavigineqaqqullutik.

Taamaammat akisunerulissaaq

Suliniut naammassineqassappat assigiinngitsutigut akisunerujussuanngorsimasoq Sustainable Now-ip ima nassuiarpaa:

  • Siunnersuisartut ullut suliffigisartagaat amerlineqassasut siunnersuutigineqarpoq
  • Siunnersuisartut ullunut sulinerannut akigitinneqartut nalingat 15 procentimik qaffanneqassapput
  • Tasiilamut angalaneq immikkut pisariaqalermat timmisartumullu bilitsit akitsoraluttuinnarmata angalanermut aningaasartuutit qaffanneqarnerat
  • Angalanerunissaq eqqarsaatigalugu ineqarnermut aningaasartuutit qaffanneqarput
  • Aningaasaliissutissanik pissarsiniarneq ilimagisamit ajornakusoorneruvoq
  • Allaffissornermut aningaasartuutit qaffassimapput

Sustainable Now-ip kommunimut aningaasanik amerlanerusunik qinnuteqaataanut tunngatillugu ineriartortitsinermut pisortaq Pernille Thorup ima allappoq:

Kommunimut saaffiginnissummi, Sustainable Now aningaasatigut ikiorserneqarnissamik qinnuteqarluni, ineriartortitsinermi pisortaq Pernille Thorup ima allappoq:

- Illoqarfimmi meeqqanut inuusuttunullu sullissisunut tamanut tatigeqatigiilluta suleqatigiillualerluta misigisimavarput. Nassuerutigissavarput suliffigisimasatsinnit tamanit nuannernerpaallunilu, unammillernarnerpaasoq siunertaqarluarnerpaasorlu.

Aningaasaliissutit amerlinissaannut aningaasaliissuteqartoqanngitsoq

Aningaasaqarnermut ataatsimiititaliami politikerinut suliamik saqqummiussinermut atatillugu 2025-mut missingersuummi Tasiilami suliniummut naleqqussaanissamut aningaasaliinerunissamullu aningaasaliisoqanngitsoq ilisimatitsissutigineqarpoq.

- Taamaattumik aningaasaliissutit ilaneqassappata sillimmatinit tigusisariaqassaagut imaluunniit aningaasaliissutit illikarteriikkat allanngortiterneqassapput, kommunimi atorfillit qullersaat ilisimatitsivoq.

Aningaasaqarnermut inuussutissarsiornermullu ataatsimiititaliap decembarip 17-ianni ataatsimiinneranni suliaq sammineqassaaq.

samfund kommuneqarfik sermersooq inuiaqatigiit budget økonomiudvalg tasiilaq sustainable now

ATORFIIT Se alle jobs

Powered by Labrador CMS