Tasiilami pinngitsaaliisoqarsimaneranik nalunaarut saniatigullu suliarpassuit aalakoornartutorsimanerup nassatai

Kalaallit Nunaanni Politiini nakkutilliisuisa pisortaat, Malik Olesen oqaluttuarpoq tallimanngornerup arfininngornerullu akornanni nunarput tamakkerlugu politiit ulapissimasut:

- Tallimanngornerup arfininngornerullu akornanni suliassarpassuaqarpugut. Suliassat amerlanerpaartaat imigassamik aalakoornartutortoqarsimanerata kingunerisaanik nalunaarutiginninnerupput; aqqusinermi eqqissiviilliortitsinerit, angerlarsimaffinni eqqissiviilliornerit, persuttaasimanerit pisullu allat suliarivagut, Malik Olesen Sermitsiamut oqarpoq.

Inunnut navianartorsiortitsisunik suliassat ilagaat Tasiilami persuttaanermut nalunaarutiginninneq:

- Suli misissuivugut, taamaattumik taanna pillugu suli oqaaseqarsinnaanngilanga, kisianni uppernarsaasinnaavara misissuineq ingerlanneqarmat, politiit nakkutilliisuisa pisortaat oqarpoq.

Uuliamik kuuttoorsimasumik katersuinermik annertuumik ingerlatsineq

Sisamanngorneq septembarip 19-anni Kalaallit Nunaanni Politiit nalunaaruteqarput umiarsuaq Nanortaliup eqqaani kivisimasoq. Kingusinnerusukkut saqqummiunneqarpoq umiarsuaq taaguuteqartoq "Adolf Jensen".

Malik Olesenip uppernarsarpaa Kalaallit Nunaanni Politiit misissuinerat suli ingerlanneqartoq, aammalu qatserisartut upalungaarsimanermillu suliaqartut umiarsuup kivinerata kingunerisaanik uuliakoorut suli salikkaat.

Tassunga tunngatillugu Kalaallit Nunaanni Politiit kaammattuuteqarnikuupput sumiiffimmi uuliakoorfiusimasup eqqaani angalasoqassappat angalasut mianersussasut arriitsumillu ingerlassasut, uuliakoorutip salinneqarnerani akornusersuinaveersaarlutik.