Tasiilaq: Piterartoqalernera DMI-p aarlerisaarutigaa
Tasiilami marlunngornermi nalunaaqutaq 11.00 missaaniit piterartoqassasoq aarlerisaarutigineqarpoq. Piterarnissaa pingasunngornerup unnuaanut atuutissasoq naatsorsuutigineqarpoq.
Tasiilami piteraq qanoq sakkortutigisinnaanersoq ilisimaneqarluareerpoq. Assimi piterartoqarsimaneranit aseruatiternerit takussutissaapput.
Arkivfoto: Thomas Kristensen
DMI-p Tasiilami piterarnissaa aarlerisaarutigaa. Piteraq avannamik kippasimmik 15-25 m/s-mik sakkortussuseqassasoq, 32 m/s anoraasuartussamik naatsorsuutigineqarpoq. Aarlerisaarut marlunngornermi novembarip aqqaneq-aappaanni nalunaaqutaq 11.00-imiit pingasunngornermi novembarip 13-iani nalunaaqutaq 01.00-ip tungaanut atuuppoq.
Kommuneqarfik Sermersooq taama nittartakkamini nalunaarpoq. Ullumi marlunngornermi piterarujussuarnissaata saniatigut, Tasiilami innuttaasut naatsorsuutigissavaat sisamanngornermi novemberip 14-ani aamma piterarujussuassasoq.
Upalungaarsimasut piareersimapput
- Tasiilami innuttaasut piumaffigineqarput pigisat tingissinnaasut aalajangersornissaat, tassani sanaartornermut atortut, umiatsiat assigisaallu pineqarput kiisalu anorersuarnerani ajoqusertoqaratarsinnaanera pinaveersaartinniarlugu illumiiginnarnissaaq kaammattuutigineqarpoq, Kommuneqarfik Sermersooq nittartakkamini allappoq.
Innuttaasut anorersuup nalaani ikiortariallit kommunimi upalungaarsimasut attaveqarfigisinnaavaat normunut ukununnga sianerluni: 113 aamma 36 77 89.
