Tassaarsuaqarsinnaaneranik mianersoqqussusisoqareersoq Galapagosip qeqertaaniit innuttaasut qimagussortinneqarput
Manerassuarmi nuna sakkortuumik sajummat nunat inoqarfiit arlallit innuttaminnik qimagussortitsipput tassaarsuaqarsinnaaneranik mianersoqqusissut tunngavigalugu.
Galapagosimiittumi Puerto Ayora-mi innuttaasut qutsinnerusumukarrapput, Manerassuarmi tassaarsuaqarnissaanik mianersoqqusisoqarnerata kingunerisaanik.
Assiliisoq: Carlos Villalba/Ritzau Scanpix
Galapagosip qeqertaani oqartussaasut innuttaasunik sinerissami najugaqartunik qimagussuinerat pingasunngornermi aallartinneqarpoq tassaarsuaqarsinnaaneranik mianersoqqussuteqareernerata kingorna.
Taamak allappoq nutaarsiassaqartitsivik Reuters.
Najugaqartut isumannaallisaanissaq pillugu qimagussortinneqarput, taama oqaatigineqarpoq. Kaammattorneqarpullu isumannaatsumik sumiiffiit pisortanit taagugaasunut ornigutissasut.
Galapagosip qeqertai 19-inik innermik anitsisartunik qeqertaqarpoq, sumiiffillu Amerika Kujallermi nunamut Ecuadorimut ilaapput.
Aammattaaq Chilemi sinerissami najugaqartut qimagussortinneqarput. Taamak allappoq dpa.
Ruslandip avannamut kangiani nunap sajunnera annertooq sumiiffinni arlalinni tassaarsuaqarsinnaaneranik aarlerisaarutinik pilersitsivoq.
Nunap sajunnera immap naqqani immap imaanik annertoorujussuarmik ingerlaalersitsivoq. Taamaattoqartillugu imaq sinerissamut apuukkaangat, qaffasissunik sakkortuunillu malissuarnik pilersitsisinnaavoq.
Ruslandip kangiani nunap sajunnera aseruatiternernik pilersitsisimasoq ilisimatitsissutigineqarpoq, taamaattorli ilimagineqaqqaakkamit annikinnerusimasoq ilanngullugu ilisimatitsissutigineqarpoq, toqusoqarneranillu nalunaaruteqartoqarsimanngilaq.
Manerassuup avannaani sumiiffinni arlalinni tassaarsuaqarsinnaaneranik aarlerisaarutit pingasunngornermi ualikkut peerneqarsimapput imaluunniit annikillisinneqarsimallutik.
Taakku ilaatigut Ruslandimut, Japanimut Hawaii-mullu atuupput.
Malissuarsuit kujammut ingerlaqqipput Fransk Polynesiamut, tassanilu aarlerisaarutigineqarsimavoq malissuit qaffasinnerpaaffissaat 4 meteriussasoq.
Missiliuineq allanngortinneqarpoq, maannakkullu naatsorsuutigineqarpoq malissuit qaffasinnerpaaffissaat 2,5 meterit missaanniissasoq, Reuters allappoq.
Ruslandimi tassaarsuaqarsinnaaneranik aarlerisaarut qaangiummat, russit ilisimatuut marlunngornermi ualikkut AFP naapertorlugu nalunaarput, innermik anitsisartoq ataaseq anitsilluni aallartissimasoq.
Innermik anitsisartoq taanna tassaavoq Kljutjevskaja Sopka Kamtjatka-mi nunap kangianiittumi.
Taanna Asiami qaqqat innermik anitsisartut portunersaraat.
- Lava ikumasoq takuneqarsinnaavoq kimmut ingerlaartoq. Innermik anitsiffiusup qulaatungaa qaamasorujussuuvoq taamatuttaarlu qaartarnera takussaalluni, Ruslandip Geofysiske Undersøgelser Telegramimi allappoq.
Innermik anitsisartup taassuma anitsilersarnera akuttunngitsumik pisarpoq.
Nunap sajorujussuarnera, tassaarsuaqarsinnaaneranik aarlerisaarutaanik pilersitsisoq, 8,8-imik sakkortussuseqarsimavoq.
Taanna nunarsuarmi nunat sajuttarnerisa sakkortunerpaat arfinilissaattut sakkortussuseqarpoq.
