Taxat pillugit suliassaqarfik Folketingimi ilaasortanit ukkatarineqartoq
Folketingimi ilaasortap Aaja Chemnitzip Danmarkimi angallannermut ministeri ataatsimeeqatigaa, Kalaallit Nunaannilu taxat pillugit suliassaqarfimmi iliuuseqapallattoqarnissaa kissaatigaa.
Danmarkimi angallannermut ministeri Aaja Chemnitzip ataatsimeeqatigaa.
IA Folketingimi
Taxat pillugit suliassaqarfik nuna tamakkerlugu akerliussutimik takutitsinerata kingorna, Danmarkimi angallannermut ministeri Thomas Danielsen (V) Aaja Chemnitzip ataatsimeeqatigaa, ilaatigut taxanut inatsisinik amigaateqarneq eqqartorniarlugu.
Ataatsimut isigalugu innuttaasunut qaninnerusunik angallannermi aaqqiissuteqartoqartariaqartoq ataatsimiinnermi erseqqissarneqarpoq, Folketingimi IA tusagassiuutinut nalunaarummi allappoq.
- Taxat pillugit inatsiseqannginnera Inuit Ataqatigiit Folketingimi ernumanartinneqarpoq. Inuiaqatigiittut inuussutissarsiutip inatsiseqannginnera akuerisaanngitsumillu ingerlatsinernik qaangerniagassaqartitsisoqarnera naammagisinnaanngilarput, IA Folketingimi allappoq.
Tamatumani inatsisiliortoqarnissaa pingaartinneqartoq, tassanilu kalaallit folketingimi ilaasortat suliamik siuarsaaqataasut, Aaja Chemnitzip erseqqissarpaa:
- Angallannermut suliassaqarfimmi qaangerniagassarpassuit innuttaasut ulluinnarni inuunerannik kalluaasut isumagineqarnissaata piffissanngornera pillugu, angallannermut ministeri oqaloqatigaara. Ataatsimiilluarpugut, tassani angallannermut ministeri tusaaniarluni Kalaallit Nunaatalu kissaatigisai malillugit inatsisiliornerit pissasut neriorsuivoq, Aaja Chemnitz oqarpoq.
Nunami sumiiffinni arlalinni akerliussutsimik takutitsineq
Sisamanngormat nunami sumiiffinni arlalinni taxartartut akerliussutsimik takutitsipput, tamatumunnga tunngatillugu inatsisinik amigaateqarnertik naammaginagu takutikkumallugu. Taxanik ingerlatitsisut akuerisaasut ernumassutigisartagaasa pakatsissutaasalu ilagaat taxartartutut allagartaqaratik angallassisut atuisunik tiguaanerat, taamaalillutik taxanik ingerlatitsisut isertitassaraluinik isertitaqartarlutik.
Tamanna pissutigalugu taxanut tunngatillugu malittarisassaliornissaq pillugu Aaja Chemnitzip angallannermut ministeri oqaloqatigaa.
- Suliassaqarfinni taakkunani siuariartornissamut Naalakkersuisullu ataqatigiissaarilluarnissaq pingaaruteqarpoq. Aaqqiissutissanik pitsaasunik nassaarniassagatta ataatsimoorluta politikkikkut tatisisinnaagatta nuannaarutigaara, Aaja Chemnitz oqarpoq.
Sammineqartut allat, soorlu sikkilinut innaallagiatortunut malittarisassat nutaat aamma imigassartorsimalluni biilertunik politiinit misissuisarnermut malittarisassat nutaat, ataatsimiinnermi aamma oqaluuserineqarput.
