Teknikkikkut ajornartorsiutit aaqqinneqarput — Mittarfik tamakkiisumik atorsinnaanngortoq
Maniitsumi mittarfik ukiuunerani teknikkikkut ajornartorsiuteqarpoq, radiokkut atortorissaarutit immikkut ittut ajoquteqarmata. Ajornartorsiut maanna iluarsineqarpoq, timmisartullu satellitsit atorlugit aamma missinnaalerlutik. Taama Greenland Airportsimi COO Niels Grosen ilisimatitsivoq.
Foto: Dorthea Reimer-Johansen
Maniitsumi mittarfik ukiukkut teknikkikkut ajornartorsiungaatsiareerluni maanna tamakkiisumik atorsinnaalerpoq.
Radiokkut atortorissaarutit mittarfiup ingerlaneranut isumalluutaasoq aserorsimavoq, kingunerisaanillu ilaasunut timmisartut taamaatinneqartariaqartarsimallutik.
Mittarfeqarfiit mittarfiup ingerlanneqarneranut akisussaasoq paasissutissiivoq upernaaq satellitsikkut timmisartup mikkiartorneranut atortorissaaruteqalersimasoq.
Navigationssystemit marluk imminnut atanngitsut
- Maniitsumi mittarfik qaammatit arlalialuit matuma siorna satellitsi atorlugu mikkiartornermi atortorissaaruteqalernikuuvoq. Kingorna aamma atortorissaarutit nutaat tikipput, nutaanngitsullu taarserlugit, Niels Grosen Sermitsiamut oqarpoq, nangillunilu.
- Tamanna isumaqarpoq maanna marlunni assigiinngitsunik, imminnut atanngitsunik atortorissaaruteqalersoq, taakku arlaat timmisartumi aquttup silarluttumi minnialernermi toqqarsinnaavaa. Taakku assigiinngitsut kinguaattoornernik taamaatitsinernillu pinngitsoortitsilluarsinnaapput, ilaasunik naammagisimaarinninnermik kinguneqarsinnaasumik.
Suliniut pisariusoq
Niels Grosen paasissutissiissutigaa suliniut ukiuni kingullerni nukinik atuinarsimasoq, atortut nunatsinni mittarfinni tamani satellitsit atorlugit minniarnerni ilusilersorneri akuerineqarnissaallu pillugit.
- Maniitsumi mittarfik kingullersaalluni atortorissaarusersorneqarpoq.
