Teknikkimut pisortaq: Ajutoortoqartillugu sarfalersuut artukkerneqarpoq

Aasianni innaallagissiorfiup nillusaatai ataasinngornermilu unnukkut ikuallammata pujuliorujussuarput, ikuallannerlu Nukissiorfiit orsussaasiviinut anngutingajassimalluni.

Nukissiorfinni teknikkimut pisortaq Filip Sivertsen illoqarfimmi nalunaaquttap akunnerini arlalinni ataasinngornermi innaallagiaaruttoqarnerani pisoq tupannaqisoq pillugu oqarpoq.

Nukissiorfinni aqutsisoqartigiit pisortallu nalaatsornikkut pisumut qanittumiipput, taakkumi ulluni makkunani Aasiannut ataatsimiigiaqqapput.

Nukissiorfiit innaallagissiorfianut imermik tarajulimmik nillusaatit pumperit arlallit imaniittut Filip Sivertsenip ikuallannermut tunngatillugu oqaluttuarai.

Ajutoortoqartillugu sarfalersuisut artukkerneqartoq

Nillusaatit aqqutaat inunnut ikaartarfilerlugu sanaajupput, taakkulu qisuttaqarlutillu plastikkinik ruujoreqarput:

- Inneq ikaartarfimmut tassunga siaruaappoq. Ikuallanneq orsussaasivimmut qanillivoq, qujanartumilli qaminneqarluni, Filip Sivertsen oqarpoq, erseqqissarpaalu qanoq ikuallalertoqarsimanersoq suli paasineqanngitsoq.

Ikuallattoqarnerani innaallagissiorfiup nillusaataa aserormat illoqarfik qamittoorpoq. Ajutoortoqartillugulu sarfalersuutit ilaat artukkerneqarmata qamittooqqasoqarnera sivisunerulersimalluni, pisortaq oqarpoq:

- Illoqarfiup annersaa ikumagaluarpoq, ajutoortoqartilluguli sarfalersuutit ilaat artukkerneqarluni. Qamippoq, kingornalu sinneri aamma artukkerneqaramik qamillutik.

Taamaalisoqarmat ajutoortoqartillugu sarfalersuiniarnermik suliaq aallaqqaataaneerneqartariaqarsimavoq:

- Illoqarfik tamaat ataatsikkut sarfalersorsinnaannginnatsigu taamaaliortariaqarpugut. Biilit 5 gearersorlutik qummukajaakkoortut ikeqqinniarnerannut assersuutigineqarsinnaavoq, Filip Sivertsen nassuiaavoq.

Unnukkut nalunaaqutaq aqquninngulersoq innaallagiamik pilersuineq iluatsippoq. Aasiannili sumiiffiit ilaanni unnuami pingasup missaani innaallagiaaruttoqaqqippoq, maannali aaqqiivigineqareerluni.

Attaveqaatit aaqqinniarnerat sulissutigineqartoq

Nukissiorfiit innaallagissiorfiata nillusaataa aallarteqqinniarlugu marlunngornermi ilungersuutigineqarpoq, ullaap tungaanilu innaallagissiorfimmi ajutoortoqartillugu sarfalersuutit pingasuusunit ataaseq ikinneqarpoq. Motoori ataaseq imermik tarajoqanngitsumik nillusarneqarpoq, taamaaliornerlu ajornartoornikkut aaqqiissutaalluni.

- Pumperit imaaniittut aserorneqanngillat, aamma kingoraartissanik peqarpugut. Illoqarfimmi ruujorilerisut suleqatigalugit imaaniit tarajulimmik nillusaat aaqqissuleruttorparput, Filipi Sivertsen oqarpoq.

Sarfalersuut ataaseq ikinneqaqqippat pilersuineq aaqqissasoq naatsorsuutigaa.

Teknikkimut pisortap Aasianni innuttaasut Nukissiorfimmi sulisunik upalungaarsimasunillu ikiuisut qutsavigai:

- Innuttaasut sulisutsinnik upalungaarsimasunillu isumassuisimammata qutsavigaakka. Taakku nerisassaqalaarniassammata kissinik, boorlunik allanillu pajuttoqarpoq. Qujamasuutigingaarparput.