Thunbergip umiarsuaata Gazamut apuutinnginnissaanik Israelip sakkutuui peqquneqarput
- Utertariaqarpusi, Gazamummi apuunnavianngilasi, Israelip illersornissamut ministeria umiarsuarmut taamak nalunaarpoq.
Greta Thunberg umiarsuarmi ikiuinianermik sulialimmi Gazamut ingerlaartumi ilaavoq.
Assi: Freedom Flotilla Coalition/Reuters
Israelsip illersornissamut ministeria, Israel Katz, sapaammi peqqussuteqarpoq, sakkutuut pinngitsoortinniassagaat umiarsuaq ikiuiniarnermik sulinermi angallassissutaasoq Freedom Flotilla Coalitionimit pigineqartoq Gaza-mut apuutissanngitsoq isumannaarneqassasoq.
Umiarsuarmi, "Madleen"-imik atilimmi, ilaasut ilagaat svenskeq silap pissusianik illersuiniarnermik suliniuteqartoq Greta Thunberg.
- Israelip sakkutuuinut peqqussuteqarpunga iliuuseqaqqullugit, "Madleen" Gaza-mut apuunnaveersaartinneqassasoq. Juutinut akerliusoq Greta ikinngutaalu erseqqissumik oqarfigaakka: Utertariaqarpusi, Gaza-mut apuunnavianngilasi, Katz nalunaarummini oqarpoq.
Angalanermi siunertaavoq Gaza-mi inuttut atugarliornerup eqqumaffigineqarnerulernissaa, aammalu ilimagineqareersimavoq umiarsuaq eqqartorneqaqisoq Gaza-mut apuunniarnerani unitsinniarneqassasoq.
Suliniaqatigiinnermik ingerlatsisut aqqaneq marluk umiarsuarmi ilaapput. Allat ilisarisimaneqartut aamma ilaapput.
Tassunga ilaapput "Game of Thrones"-imi isiginnaartitsisartoq Liam Cunningham aamma franskeq Rima Hassan, Europa-Parlamentimi ilaasortaasoq.
Hassan oqarpoq, suliniaqatigiit "inuttut atugarliortut tikitsaaliorneqarnerat akerliuffigineqartoq" taannalu Israelimik isornartorsiuivoq, Israel "inuiannik toqoraasneq" Gaza-mi ingerlanneqarnerarlugu. Hassan oqarpoq, "Israelip pinerluttulioraluarluni pillagaannginneranik" eqqumaffiginninnerup annertusarnissaa nammineq kissaatigigini.
Israelip nunarsuarmi tamarmi sakkortuumik isornartorsiorneqarpoq Gazami inuit ajornartoornerannut tunngatillugu.
Sapaatip akunnerini 11-ini Israelip ikiueqqaarnissamut matooraanera Gazami inunnik ikiuinianermut ajornartorsiutaasoq suli ajornerulersimavoq. Matoorineq 19. maajimi annikillisinneqarpoq.
Sapaatip akunnerata matuma siorna aallannginnermini Thunberg nunarsuarmi tusagassiortunik naapitsivoq.
- Suliassaq una qanorluunniit navianartigigaluarpat, inuiannik toqoraaneq nunarsuarmi tamarmi nipangiutiinnarneqartoq ulorianarneruvoq, tassami toqoraaneq allaat toqqaannartumik aallakaatinneqarpoq, nutaarsiassaqartitsivik svenskit TT naapertorlugu taanna oqarpoq.
2010-mi aamma pisoqarpoq Israelip umiarsuaatileqatigiiffik Gaza Freedom Flotilla pillugu.
Taamani Israelip sakkutuuisa umiarsuaasa aammalu illuatungaani Gaza-mut ikiuiniarlutik suliniuteqartut Gaza Freedom Flotilla aporaapput. Taamani Israelip qimaguteqqusilluni kaammattuutai Ashdodip illoqarfianut umiarsualivimmut ingerlaqqullugit suliniaqatigiit itigartippaat.
Taamaattumik Israelip sakkutuui umiarsuit ilaannut ikipput . Taakkunannga inuit suliniaqatigiiffimmeersut qulingiluat toqutaapput.
