UNNERLUUSSISUSSAATITAASUT PISORTAAT
Tigummigallagaanermut piumasaqaatit tamarmik naammassineqarput
Paul Watson aamma illersuisui Nunatta Eqqartuussivianut paasissutissanik, assinik aamma videonik saqqummiussinissaminnut akuerineqarput, taakku naapertorlugit tigummigallagaanera tunngavissaqanngimmat aammalu unitsinneqartariaqarmat, saqqummiussinerlu ullaap tungaa tamaat ingerlanneqarpoq. Taamaakkaluartoq Kalaallit Nunaanni Eqqartuussiviup qullersaani eqqartuussisoq saqqummiussiffigineqartoq ilaliinngilaq. Eqqartuussisormi unnerluussisussaatitaasut pisortaatulli isumaqarpoq tigummigallagaaneranut piumasaqaatit naammassineqarsimasut.
Paul Watson Kalaallit Nunaanni Eqqartuussivimmi ataasinngornermi nalunaaquttap akunneri arlallit ataatsimeereernerup kingorna. - Suliaq pineqartoq uannut tunngasoq politikkikkut suliaavoq, naggasiilluni oqaaseqarnermini ilaatigut taanna oqarpoq.
Assiliisoq: Leiff Josefsen
Ullaaq nal. 09:00-miit ullup qeqqata tungaanut, Paul Watson-ip illersuisui periarfissinneqarput unnerluussutaa Landsret-imut suliakkiissutigissallugu.
Paul Watson juulip 21-aniilli tigummigallagaavoq, maannalu Nunatta Eqqartuussisuuneqarfiata aalajangiineratigut Kalaallit Nunaanni Eqqartuussiviup aalajangiinera malillugu suli tigummigallagassanngorlugu oktobarip 23-ata tungaanut.
Paul Watson-ip suli tigummigallarneqarnera pivoq, taamaalilluni qulakkeerneqassammat tunniunneqarnissaanut aalajangerneq pippat najuunnissaa.
Taanna aalajangiineq Paul Watson-ip illersuisuisalu Nunatta Eqqartuussisuuneqarfianut suliakkiissutigisimavaat eqqartuussivimmi eqqartuussut atorunnaarsinneqarnissaa anguniarlugu. Tamatuma kingunerisaanik Paul Watson-ip illersuisui periarfissinneqarput paasissutissanik, assilisanik arlalissuarnik aamma videoklip-inik arlalinnik takutitsissallutik.
Taamatuttaaq aamma periarfissinneqarput Kalaallit Nunaanni Eqqartuussisoqarfiup aamma Kalaallit Nunaata Politiivisa suliamik ingerlatsinerat pillugu apeqqusiinerminnik tunngavilersuissallutik, tassami isumaqaramik tigusarineqartariaqarsimanngitsoq aamma tigummigallagassanngortinneqartariaqarsimanngitsoq.
Unnerluussisussaatitaasut pisortaat: Suliap annertussusia aamma qimaanissamut aarlerinartoqarnera qitiupput
Kisianni Kalaallit Nunaata Politiivini unnerluussisussaatitaasut pisortaat, Mariam Khalil, sakkortuumik ingerlatsivoq tigummigallagaanerata nanginneqarnissaa anguniarlugu:
- Kalaallit Nunaata Politiia misissuinerminik naammassinnippoq aamma Inatsisit atuutsinneqarnerannut ministeriaqarfimmut innersuussissutit tunniunneqareerput, tamanna pivoq septembarip 29-ani, maannalu Naalagaaffiup eqqartuussissuserisuunerata misissuinerup inerneri nalilersoreerunigit Justitsministeriamut aalajangiiffigisassatut innersuussut apuutissamaarpaa.
- Unnerluussissutigineqartumi nakuusernerup annertussusianik aamma qimaanissamut aarlerinartorsiornerup piviusuuneranik, unnerluussisussaatitaasut tungaannit qularinngilarput Paul Watsonip nangittumik tigummigallagaanissaanut piumasaqaatit tamarmik naammassineqartut, tassa Kalaallit Nunaanni oqartussat qularutiginngilaat Paul Watsonip tigummigallagassanngortinneqarnera Kalaallit Nunaanni eqqartuussisarnermik inatsisit aamma Kalaallit Nunaanni tunniussinissamut inatsit naapertorlugit pisoq.
Unnerluussisuunerup qimaanissamut aarlerinartoqarneranut tunngatillugu tunngavilersuutigaa Paul Watson 2014-imi, tassani tunniussisoqarnissaanik suliassat marluk ingerlanneqaraluartut Tysklandimit qimaasimammat.
Mariam Khalil Sermitsiamut ilanngullugu oqaluttuarpoq, Justitsministeriap tunniussisoqassanersoq aalajangersimanera pisimanngillat 23. oktobari sioqqullugu, taava pineqaatissinneqarsimasunut inissiisarfimmiitinneqarnerata sivitsoqqinneqarnissaa unnerluussisunit qinnuigineqarumaartoq, tamannalu pissaaq Paul Watsonip Japanimut tunniunneqarnissaa pillugu aalajangiisoqarnissaata tungaanut.
Illersuisut Højesteretimik utaqqipput
Tassa Paul Watsonip Nuummi pineqaatissinneqarsimasunut inissiisarfimmut utertitaanera kingumut pivoq, tamatumalu ilutigisaanik taassuma illersuisui eqqartuussissuserisut maanna piareersarput suliap Naalagaaffimmi eqqartuussiviit qullersaannut Højesteret-imut apuunneqarnissaanut:
- Højesteretimut suliap ingerlateqqinneqarnissaanut qilanaarpugut, upperaarpummi naatsorsuutigalugulu uppernarsaatit saqqummiutassagut tunngavigalugit naapertuilluartumik aammalu illuinnaasiunngitsumik aalajangiisoqassasoq, soorunalumi sulissutigaarput neriuutigalugulu Paul Watson aniguisinneqassasoq, illersuisoq Finn Meinel Sermitsiamut oqarpoq.
Suli ullulerneqanngilaq qaqugu Højesteretimut suliassaq saqqummiunneqarsinnaanersoq.
