Tillinniat lastbiilini tillitaminni ajutoortut

Nuummi suli tillinniartoqangaatsiartaarpoq.

Politiit pigaartuisa pisortaat Carl Sværd oqaluttuarpoq politiit nalunaaqutaq 04.57 nalunaarfigineqartut illoqarfiit pingaarnersaanni lastbili tillinneqarsimasoq.

Tillinniat Kujallerpaat aqquserngisigut biileramik qullilerfimmut aporsimapput.

Politiit sumiiffimmut tikiummata tillinniat ingerlareersimapput, taamaammat takunnissimasinnaasunik politiit maanna ujartuipput.

Biilinik tillinniartoqarsimanerata saniatigut neriniartarfimmut Charoen Pornimut aamma tillinniartoqarsimasoq politiit pigaartuisa pisortaata nalunaarutigaa.

Tillinniartoqarsimaneranik nalunaaqutaq 04.11 nalunaartoqarpoq, tillinniallu sodavandinik cigarettinillu tillissimasut paasineqarluni.

Neriniartarfik ullualuinnaat ingerlaneranni aappassaat tillinniarfigineqarpoq. Neriniartarfiup aningaasaatai uninngasuutit sapaammi ullaakkut aamma tillinneqarsimapput.