Timmisartoq Challenger anguniakkamut suli naammassinninngitsoq
Timmisartoq Challengeri ukioq manna ulluni 288-ini Kalaallit Nunaanniissasoq illersornissamut ministerip Troels Lund Poulsenip kisitsisaataasa nutaat takutippaat. Ukiorlu kaajallallugu Kalaallit Nunaanniittarnissaanut anguniakkamut naammassinninnani.
Illersornissaqarfiup timmisartua Challenger annaassiniarnermut ilaatigut atorneqartarpoq.
Assi: Arktisk Kommando
Illersornissaqarfiup timmisartoq Challenger ukiumut ulluni 365-ini Kalaallit Nunaanniittassasoq Folketingip 2016-imi akuersissutigaa. Timmisartoq nunap oqartussaaffianik illersuinermut annaassiniarnernilu atorneqartarpoq.
Aalajangertoqarneraniilli ulloq manna tikillugu anguniagaq tamakkiisumik naammassineqarsimanngilaq. 2025-milu aamma anguneqarsinnaanavianngitsoq qallunaat aviisiat Berlingske pingasunngornermi allappoq.
Allaaserisarmi illersornissamut ministerip Troels Lund Poulsenip kisitsisaatai nutaat innersuussutigineqarput, taassuma timmisartoq Challenger 2024-mi ulluni 278-ini Kangerlussuarmiittoq Folketingimut akissummini ilisimatitsissutigaa.
2025-mi timmisartoq ullunik qulinik amerlanerusunik, tassa ulluni 288-ini, atorsinnaanissaa naatsorsuutigineqarpoq.
Danmarkip Kalaallit Nunaanni illersuinissamik pisussaaffiminik naammassinninnginnerarlugu USA-p præsidentiata Donald Trumpip arlaleriarluni isornartorsiutigisagaanut tulluarpoq. Forsvarsakademimi lektori Jon Rahbek Clemmensen Berlingskemut oqarpoq:
- Tamanna USA-p naalakkersuisuisa Danmarkip illersornissaqarnikkut neriorsuutiminik eqqortitsinnginneranik isummernerannut ilasaataavoq, oqarpoq.
Timmisartup, ilaatigut illersornissaqarfiup sakkutuujunngitsunut suliassaannut, soorlu annaassiniarnermut suliaqarnermut, pingaarutilimmik sunniuteqarsinnaasup, Kalaallit Nunaannut pisussaaffimmik naammassinninnginnera pillugu Folketingimut ilaasortap Aaja Chemnitzip (IA) arlaleriarluni isornartorsiorpaa.
