Juullisioriarneq nuannersuusussaagaluaq nuanniitsumik naavoq.
Meeqqat mikisut ilagalugit nalunaaquttap akunnerini sisamani tallimaniluunniit timmisartumi issianeq pikkunarsinnaavoq, piffissamimi sivisuumi inissakilliorlutik issiasussaagamik.
Juullisioriarneq nuannersuusussaagaluaq nuanniitsumik naavoq.
Meeqqat mikisut ilagalugit nalunaaquttap akunnerini sisamani tallimaniluunniit timmisartumi issianeq pikkunarsinnaavoq, piffissamimi sivisuumi inissakilliorlutik issiasussaagamik.
Pilersaarutaanngitsumillu suli nalunaaquttap akunnerini sisamani tallimaniluunniit suli issiaqqittussanngorluni suli pikkunarneruvoq.
Tamanna ilaqutariit Olsen Skjeldsagerikkut Københavnimiit Nuummut januaarip pingajuanni timmisartortillutik misigaat.
Ilaqutariit sivisuumik timmisartornissartik piareersimaffigereeraluarlugu, Københavnimut utertariaqalerneq sakkortunaarpaat.
Uterneq aliasunnartoq
- Qissaserpunga, Nuup tungaanut aqqutaa qasunareerami, ingammik marlunnik nukangasunik meerartaqarluni.
Ilaqutariit meerartatik marluk itertarfii sioqqullugit, tassa nalunaaquttap akunneri pingasut itertarfii sioqqullugit itersarpaatt, mittarfimmeereertussaagamik aallarnissamut nalunaaquttap akunneri pingasut sioqqullugit, taamaattumik meeqqat sinnakipput.
Angajulleq niviarsiaq pingasunik ukioqarpoq, taassumalu paasisinnaasimanngilaa sooq piffissaq eqqorlugu Sisimiunut angerlalinnginnerlutik. Nukappiararlu ataatsimik ukiulik pisuttalerlaajuvoq, taamaattumillu qallorlunilu pisuttaqattaarusuppoq. Uninngasinnaannginnamilu qiasaqattaarpoq
- Qasuvugut, nukangagamik nassuiaakkuminaakkamik.
Timmisartumi siumuinnaq meeqqat nerisassaannik innimiissunneqarnikuupput, utimullu innimiissunneqarnikuunnginnamik meeqqat nerisassaannik pinatik inersimasut nerisassaata assinganik pipput, nerisinnaannginnamikkillu aqqutaani kaalerput.
- Utimukartariaqaleratta meeqqanut nerisassat tulluarpallaanngillat, Perlikumisaalerput taava, Emilie Olsen Skjeldsager oqaluttuarpoq, angajoqqaanullu angalasussanut siunnersuutigalugu angalassamaarunik nalunartut pillugit nerisassanik nassarluassasut.
Angalasut qasusut
Angalaneq naammassiartuaalermat timmisartumi nipaanneq pivoq, taamaakkaluartoq meeqqat qasullutik qiasut tusarsaapput.
- Kisitta qasunngilagit, allat angajoqqaat aamma tiimerpassuarni meeqqaminnik eqqissisimatitsiniaapput, angajoqqaat qasorrattugut malunnarpoq, Emilie Olsen Skjeldsager oqaluttuarpoq.
Ilaqutariit allat aamma qasuneq misigaat. Ilaqutariit marlunnik arfineq-marlunnik qulinillu ukiulinnik qitornallit aamma qasusimallutik oqaluttuarput, meeqqalli anginerulaarmata paasinnilluarsimapput.
- Soorunami meerartagut qasupput, aquutaani utimut sinitsilaarpagut, uagutsinnut aamma qasunarpoq, Søren Solvig marlunnut ataataasoq oqaluttuarpoq.
Aaqqiissutissat pitsaanerusut ujartorneqartut
Timmisartoq Københavnimut utermat ilaqutariit hotelimut inissinneqarput. Emilie Olsen Skjeldsager oqaluttuarpoq ilaqutariit meerartallit salliunneqartut, utaqqisunilu tunuleriiaattuni siuartinneqarlutik. Tunuleriaattut inuit 200-300 missaaniipput.
- Sullinneqarluarpugut nerisassaqarlutalu.
Tamanna Søren Olsvigip uppernarsarpaa, nunatsinnili nunnikkallarfissaqannginneq isornartorsiorpaa:
- Taamannak angalaneq isumaqarpunga torrallataanngittoq aaqqiipallannertut taasariaqarpoq, mittarfissuarmik atulersitsiniapallannertut taaneqarsinnaavoq pissutigalugu plan A-B-C peqartariaqaraluarmat. Sooq Kangerlussuarmut mikkallarsinnaanngilagut?
Emilie Olsen Skjelsagerip aamma tamanna uparuarpaa, Ilulissanilu mittarfissaq aatsaat aappaagu ammartussaaneranut aaqqiissutissamik peqannginnersoq uparuarlugu.
- Soormi Ilulissani mittarfissap ammannginnerani Kangerlussuaq ammateqqaalaarsimagunikkut mikkallarfissatut atorlugu.
Taassuma ilanngullugu oqaatigaa, Nuummut missinnaanngikkaanni Kangerlussuarmi mittarfeqareermat mikkallarfiusinnaagaluartoq. Ilulissanilu mittarfik suli ammanngimmat sulisut illoqarfinnut allanut nuunnagit Kangerlussuarmi suleqqaaginnarsinnaannginnersut.
Air Greenlandi qaammat kingulleq nassuiaavoq Kangerlussuarmut minnissaq sapinngisamik pinngitsoortinneqassasoq, inuttat sulisut qasuersaarfissaat pillugu malittarisassat pissutigalugit, sulisullu qasuersaanngippata sullitanut sunniuteqarsinnaammat.
