KL

DK

Timmisartorsuit marluk aamma utiinnarput – Kangerlussuaq ullumi atoqqinneqassaaq

Air Greenland Nuup Københavnillu akornanni Atlantikoq qulaallugu timmisartuussinernit eqqugaasut sullinniarlugit ilungersorsimavoq. Spaniamiut timmisartortitseqatigiiffiata angalasut arlallit sapaatip-akunnerata naanerani Nuummukaappai.

Vamos Air marloriarluni Nuummut Sapaatip-akunnerata naanerani mippoq, taamaalilluni Air Greenlandip Københavnimiit Nuummut ilaasunik timmisartuussinissamut pilersaarutini maleqqilerlugit nalinginnaasumik timmisartuussinerit ingerlaqqilerput.
KASSAALUK KRISTENSEN
Digitalimik aaqqissuisoq
Saqqummersinneqarpoq

Kalaallit Nunaata kitaani timmisartuussinerit amerlanersaat sapaatip-akunnerani kingullermi sisamanngornermi tallimanngornermilu taamaatiinnarneqarneranni, inuit tusindilikkaat Tuukkaq Danmarkimiit Nuummut marloriarluni ingerlaarnera Flightradar aqqutigalugu malinnaaffigaat.

Mittarfik quasarmat Tuukkaq marloriarluni Københavnimut utiinnarpoq, taamaalillunilu ilaasut arlallit akunnerpassuarni timmisartoreerlutik Københavnimeeqqittariaqarsimallutik.

Nuummi pissutsit immikkut ittut pissutigalugit ilaasorpassuit kinguaattoormata Air Greenland Spaniamiut timmisartortitseqatigiiffiannit Vamos Airimit timmisartumik allamik attartoarpoq.

Timmisartut marluk ataasinngornermi utiinnartut

Vamos Air Nuummut arfininngormat sapaammilu missinnaasimavoq, Tuukkarlu pilersaarutit malillugit aamma milluni.

Ataasinngormalli pissutsit ajorseqqipput.

Tuukkaq nalunaaquttap-akunnerata ataatsip missaani Nuup qulaani kaaviiaareerluni Københavnimut utertariaqarsimasoq Air Greenland ilisimatitsivoq.

Taamaattoqarnera pissutigalugu Savalimmiuni timmisartuutileqatigiiffiup Atlantic Airwaysip timmisartua attartorneqartoq Islandi nallerlugulu aamma utiinnarpoq.

Kangerlussuarmukartoqassasoq

Ajornartooqqasoqarnera pissutigalugit Kangerlussuup mittarfia atorneqassasoq Air Greenland ilisimatitsivoq.

Nuummimi mittarfiup aqqutaa quarsartoq Air Greenlandip timmisartuinit Dash-8-nit suli miffigineqarsinnaavoq:

- Tamanna pillugu aalajangiupparput aqagu Tuukkaq Kangerlussuarmut missasoq, ilaasullu Kangerlussuarmiit nunatsinni sumiiffinnut ornitaannut apuussussallugit. Maluginiarsiuk taamaaliorneq maannamut taamaallaat marlunngornermi 7. januar 2025 pissammat, Air Greenland allappoq.

nye lufthavne nuuk inuiaqatigiit air greenland aflysninger samfund vamos air

ATORFIIT Se alle jobs

Powered by Labrador CMS