GREENLAND AIRPORTS
Timmisartut tamarmik 2025-mi Kangerlussuarmut missinnaassapput
2025-mi januaarip aallaqqaataani timmisartut tamarmik suli Kangerlussuarmut missinnaallutillu Kangerlussuarmit aallarsinnaassapput. Sillimaniarnerli qasukkarneqassaaq, Greenland Airports Illersornissaqarfimmik isumaqatigiissuteqareerluni ilisimatitsivoq.
Kangerlussuup Mittarfiata atornissaanut Illersornissaqarfimmik ukiuni pingasuni atuuttussamik isumaqatigiissut nutaaq Greenland Airportsimit nuannaarutigineqarpoq. Timmisartoqarfissap nutaap ammarneqarnerata kingorna timmisartuussinerit Nuummut nuunneqarpata isumaqatigiissut atuutilissaaq.
Assi: Leiff Josefsen
Kangerlussuarmi mittarfik pillugu Illersornissaqarfimmik ukiuni pingasuni atuuttussamik isumaqatigiissut pillugu Greenland Airportsip maanna sukumiinerusumik paasissutissiivoq.
Timmisartut tamarmik suli missinnaallutillu aallarsinnaassasut, kiisal isumannaallisaanermi malittarisassat qasukkarneqarsimasut, timmisartortitseqatigiiffiup paasissutissiissutigaa.
Kangerlussuup mittarfiata ukiuni pingasuni atorneqarnera Illersornissaqarfiup akilerumaaraa, sapaatip-akunnerani matumani siusinnerusukkut illersornissamut ministerip Troels Lund Poulsenip folketingimi ilaasortamut Aaja Chemnitzimut allakkatigut akissummini ilisimatitsissutigaa.
Mittarfiup ingerlaannarnissaa isumaqatigiissutip qulakkeertussaavaa, ukiarumi Nuummi mittarfissap nutaap atlantikoq qulaallugu angallassineq tiguppagu ilaasut amerlanersaat annaaneqarsinnaammata.
Sakkutooqarfimmiunit inuinnarnillu suli atorneqarsinnaasoq
Illersornissaqarfiup mittarfimmik atuinermut akiliutissaanut sinaakkutissat isumaqatigiissutigineqarsimasut Greenland Airports tusagassiuutinut nalunaarummi ilaatigut erseqqissaavoq, tassa mittarfik suli Kalaallit Nunaannit Greenland Airportsimit ingerlanneqassasoq, kiisalu mittarfit sakkutooqarfimmiunit inuinnarnillu atorneqartuarsinnaasoq.
Timmisartut tamarmik — minnerit annerillu — suli missinnaallutillu aallarsinnaasut, timmisartortitseqatigiiffiup aamma erseqqissarpaa.
Allannguutit marluk
Greenland Airports naapertorlugu isumaqatigiissut marlunnik allannguuteqarpoq. Mittarfik maanna timmisartunik aqutsisoqarluni (ATC) ingerlanneqarpoq:
- Tamanna timmisartut pillugit paasissutissiisoqarfilerlugu (AFIS) 2025-mi januaarip aallaqqaataani allanngortinneqassaaq, tamatumani nunatsinni inuinnarnut mittarfiit tamarmik, Nuummi Ilulissanilu mittarfiit ilanngunneqarput. AFIS-ittaaq nunani allani, assersuutigalugu Vagarip mittarfiani Savalimmiuniittumi, aamma atorneqassapput, Greenland Airports allappoq.
Tamatuma kingorna isumannaallisaaneq qaffasissutsimit 1-mit qaffasissutsimut 2-mut 2025-mi januaarip aallaqqaataanit qasukkarneqassaaq.
- Matumani Kangerlussuup mittarfianit nunarsuarmi mittarfinnut sumiikkaluartunulluunniit suli timmisoqarsinnaassaaq, akuersissuteqarlunili ingerlaqqittussatut nalunaarsorsimanngikkaanni ingerlaqqittoqarsinnaassanngilaq.
Nassatat tunniussivikkoorteqqinneqassapput
- Angalasutut timmisartumik tikiffimmit ingerlaqqissagaanni nassatat tunniussivikkoorteqqinneqarlutillu nakkutilliisunit misissortittoqaqqissaaq. Periuseq taanna assersuutigalugu Narsarsuarmi Ilulissanilu atorneqarpoq, Greenland Airports allappoq.
Timmisartuussinermut ingerlatseqatigiiffiit maannamit sumut sumiillu timmisartuussissanerlutik aalajangertassavaat, tamannalu Kangerlussuup mittarfiata qanoq atorneqartiginissaanut aalajangiisuujumaarpoq, timmisartoqassuserlu timmisartullu suussusaat Kangerlussuup mittarfiani nunamiit sullinneqarnerup qanoq ittuunissaanut aamma aalajangiisuujumaarput.
Greenland Airports Regionalimi pisortap Henrik Estrupip Illersornissaqarfimmik isumaqatigiissuteqarneq nuannaarutigaa:
- Illersornissaqarfillu isumaqatigiissuteqarnerput nuannaarutigaara, maannalu Kangerlussuup siunissami ingerlaannarnissaa ernumanarunnaarpoq, oqarpoq.
