Toqungasoq nassaarineqarpoq: Angut maqaasineqartoq toqungasoq nassaarineqarpoq
Narsarsuup ungasinngisaani sissami sapaatip-akunnerata naanerani toqungasoq nassaarineqartoq Kalaallit Nunaata Politiivinit kinaassusersineqarpoq. Toqungasoq angutaavoq 2024-mi upernaakkut maqaasineqartoq. Ilaqutai kalerrinneqarput.
Leiff Josefsen
Inuk toqungasoq Narsarsuup ungasinngisaani sissami nassaarineqartoq pillugu Kalaallit Nunaanni Politiit arfininngormat unnukkut nalunaarfigineqarput.
Politiit pineqartoq kinaassusersiniarlugu kingorna misissuipput.
- Kinaassusersineqarpoq. Angut taanna ukioq manna maajimi maqaasineqartoq pineqarpoq. Taamani ujaasisoqalerpoq, ajoraluartumilli tamanna kinguneqarsimanngilaq, Kalaallit Nunaanni Politiini pigaartut pisortaat Anette Ostenfeldt Sermitsiamut oqarpoq.
Angut taanna maajip qiteqqunnerani umiatsiamik angalareerluni utersimanngimmat, ilaquttaanit ernumassuteqartunit maqaasineqartutut nalunaarutigineqarpoq.
Ilaqutaasut kalerrinneqarsimasut Kalaallit Nunaanni Politiit ilisimatitsipput.
