Toqutsisimasutut pineqaatissinneqarsimasoq suliami nutaami paarineqartussanngorlugu eqqartuunneqartoq
Angut 53-inik ukiulimmik toqutsisimasutut paarineqartussanngorlugu eqqartuunneqarpoq. Pineqartup eqqartuussut nunatta eqqartuussivianut suliareqqitassanngortippaa.
Toqutsineq Qaqortumi februaarip pingajuata sisamaatalu akornanni 2023-mi pivoq.
Assiliisoq: Nina-Vivi Møller Andersen / Sermitsiaq
Angut 35-nik ukiulik angummik 53-inik ukiulimmut Qaqortumi inissiarsuarmi angerlarsimaffimmini 2023-mi februaarimi toqutsisimasutut paarineqartussanngorpoq.
Eqqartuussivik Kujallermi tallimanngormat ullaakkut eqqartuussut taama aalajangerneqartoq Kalaallit Nunaanni Politiit tusagassiuutinut nalunaarummi allapput.
Angutip 35-nik ukiullip angut 53-inik ukiulik niaquatigut anaalerneratigut, timaatigut arlaleriarlugu tilluarneratigut isimmigarneratigullu toqussimagaa Eqqartuussivik Kujallermi pisuutinneqarpoq.
- Pineqartoq ima nakuuserfigineqartigaaq toqussutigalugulu. Ajoqusernerit annertussusaat amerlassusaallu naapertorlugit pinerluuteqartoq toqutsiumalluinnartutut pisimasoq takussutissaqarpoq, unnerluussisussaatitaasoq Alexander Stürup, suliamik aqutsisoq oqarpoq.
Eqqartuussiviup paarineqarnissaanik aalajangernermini ilaatigut tunngavilersuutigaa unnerluutigineqartoq 2014-imi aamma toqutsisimasutut eqqartuunneqarsimammat, Politiit ilisimatitsipput.
- Angut marlunnik toqutsisimasoq pineqartillugu aamma misissuisartut naliliinerat naapertorlugu inunnik allanik navianartorsiortitsippat, taava pineqaatissiissut eqqortoq kisimi tassaasinnaavoq paarineqarnissaanik pineqaatissiissut, Alexander Stürup oqarpoq.
Angutip 35-nik ukiullip pinngitsuunnginnerarluni eqqartuussut suliareqqitassanngortippaa, taamaattumillu suliaq Nunatta Eqqartuussisuuneqarfiani suliareqqinneqartussanngorluni.
