Toqutsineq ingasattumik peqqarniitsoq
naammassineqangajalerpoq.
Ukiut marluk qaangiuttullu.
Toqutsineq ingasattumik peqqarniitsoq
naammassineqangajalerpoq.
Ukiut marluk qaangiuttullu.
Blok 5-imi toqutsineq pillugu killiffik
Siorna aamma politiillu misissuillutik ulapputigingaatsiarsimasaannik Nuummi toqutsisoqarpoq.
MInnerunngitsumik angut Blok 5-imi toqqorsiviup iluani toqungasoq nassaarineqartoq politiit oktobarip sisamaani ullaakkut nalunaarfigineqarput. Angut 20-nik ukioqarpoq.
Toqutsisoqarsimatillugu paasiniaanermi ileqquusut malillugit politiit nipangiussisimapput, kisianni ileqqut malinnagit angutip toqutsisoqarnissaa sioqqullugu qanoq ingerlasimanera paasiniarlugu toqutaasimasup kinaassusia aqqalu ilisimatitsissutigaat. Politiit kinaassusaa kingorna kinaassusia nipangiuteqqippaat. Suliaq suli paasiniarneqarpoq, inullu ataaseq tigummigallarneqarpoq, politiit AG-mut ilisimatitsipput.
2024-mi toqutsinerit marluk sapaatip akunnerani kingullermi eqqartuussutigineqarput. Kujallermi Eqqartuussiviup angut 27-nik ukiulik Nanortalimmi arnamik 65-inik ukiulimmik toqutsisimasutut pisuutillugu ukiuni arfineq marlunni affarmilu pineqaatissinneqarsimasunut inissiisarfimmiittussanngortippaa. Sermersuup Eqqartuussiviani angut 28-nik ukiulik aappaminik savimmik toqutsisimasutut ukiuni arfineq pingasuni pineqaatissinneqarsimasunut inissiisarfimmiittussanngortinneqarpoq. Meeqqat sisamat illumiipput taakkunanngalu marluk toqutsineq takuaat. Meeqqat pingasut toqutaasup qitornarisai tamarmik taarsiiffigineqarput.
Eqqartuussaasut tamarmik pineqaatissinneqarnertik akueraat.
Arnaq utoqqaq 82-inik ukiulik Nuup illoqarfiata qeqqani Blok
O-mi inissiamini toqungasoq 2023-mi januaarip naanerani nassaarineqarpoq. Arnaq
toqungasoq siniffimminiittoq qatserisartunit nassaarineqarpoq, tassami
toqutsisup inissiaq ikummarsimavaa. Aammattaaq arnaq kiinnamigut
unatarneqarluni toqusimasoq, timaalu ajoqusersimasoq misissuinerup takutippaa.
Arnap nassaarineqarneranit ullut qulit qaangiuttut angut
inuusuttoq politiit Nuummi umiarsualivimmi tigusaraat, taannalu ukiuni marlunni
kingullerni tigummigallarneqarpoq.
Suliaq Sermersuup Eqqartuussivianut siorna oktobarimi
ingerlateqqinneqarpoq, tassanilu suliaq ilungersunartutut pinerlunnermut
sakkukinnerulersitsisinnaanngitsutut nalilerneqarluni. Taamaammat
eqqartuussiviup unnerluussisussaatitaasut piumasaat malillugu angut maanna
22-nik ukioqartoq piffissaligaanngitsumik tigummigallagassanngortippaat.
Eqqartuussinerup kingorna unnerluussisussaatitaasoq Signe
Egsgaard oqarpoq:
- Eqqartuussiviup naliliinera naammagisimaarpara.
Eqqartuussiviup eqqartuussutiminut tunngavilersuutimini suliami pisut
sukannernerulersitsisut, unnerluussisussaatitaasup pisimaneratut, amerlasuut
pingaartippai, ilaatigullu toqutsinerup peqqarniinnera pissutigalugu suliami
matumani tigummigallarneqarnissaa pisariaqartoq isumaqarput. Kalaallit Nunaanni
Politiit pinerlunnerup tamatuma paasiniarnerani, qulaarneqarnerani
eqqartuussivikkullu ingerlateqqinnissaani ulapingaatsiarsimapput, tamannalu
maanna aalajangiiffigineqarpoq, unnerluussisussaatitaasoq Kalaallit Nunaanni
Politiinit tusagassiutitigut nalunaarummi oqarpoq.
Angut pisuunnginnerarlunilu eqqartuussiviup aalajangiinera
eqqartuussummik allanngortitsinissamut suliassanngortippaa.
Nunatta Eqqartuussiviata suliassanngortitsineq ulluni
tallimani, sapaatip akunnerata tullia tamaat, suliarisussanngorpaa,
suliassanngortitsinermilu unnerluussut arfineq-marlunnik avaanngunartunik
imaqarpoq. Angut toqutsisimasutut unnerluutigineqarnerup saniatigut ilaatigut
pinngitsaaliilluni atoqateqarsimasutut, toqungasumut kannguttaatsuliorsimasutut
ikuallatsitsisimasutullu unnerluutigineqarpoq. Unnerluussut naapertorlugu arnaq
kikiassuarnut killuummiit nivaattamillu unatarneqarsimavoq kiinnamigullu aqqunartitersimanermi
kingunerisaanik toqusimalluni.
