KL

DK

Trump: Kalaallit Nunaata aqunnissaa piginissaalu pingaaruteqarluinnarpoq

Donald Trumpip Danmarkimi aallartitassani toqqarpaa. Tamatumalu saniatigut Kalaallit Nunaat eqqarsaatigeqqilerpaa.

USA-p Kalaallit Nunaat pisiarissagigaa Donald Trumpip 2019-imi siunnersuutigaa. Sammisaq maanna oqaluusereqqilerpaa.
Ritzaus Bureau
Saqqummersinneqarpoq

USA-p præsidentissaata Donald Trumpip Amerikamiut Kalaallit Nunaannik aqutsisinnaanerannik qulakkeerinninniarluni isumani allanngortissimagunanngilaa.

Trumpip inuit attaveqaqatigiittarfianni, Truth Social-imi, Kalaallit Nunaata naalakkersorneqarnissaanik pigilerneqarnissaanillu eqqarsaatini sapaammi unnukkut saqqummiuppai.

- Nunap isumannaatsuunissaa nunarsuarmilu eqqissineq eqqarsaatigalugit Kalaallit Nunaata piginissaa aqunnissaalu pingaaruteqarluinnarput, Trump allappoq.

Amerikamiut oqartussaanerat aalajangiisuusoq Trump allanngilaq. USA-p Kalaallit Nunaat pisiariumagaa aamma allanngilaq.

Pisiariumanninneq 2019-imi itigartinneqartoq

USA-p Kalaallit Nunaannik pisinissaanik siunnersuuteqarneq Trumpip præsidentitut atuuffiani siullermi Danmarkip USA-llu suleqatigiinneranni aaqqiagiinngissuteqartitsivoq, Siunnersuut Trumpip aggustimi 2019-imi saqqummiuppaa.

Taamanikkut siunnersuut ministeriunerup Mette Frederiksenip erngerluni itigartippaa. Oqallinneq tamaat „asuliinnaq oqalunnertut“ taavaa.

Kingusinnerusukkut Trumpip Mette Frederiksenip oqaasii „nasty“-mik taavai, taannalu kalaallisut ajuissutut maajunnartutulluunniit isumaqarpoq.

Taamanikkut Naalakkersuisut siulittaasuata Kim Kielsenip (S) Kalaallit Nunaat tuniniarneqanngitsoq aamma erseqqissarpaa.

Ukiut tallimat sinnerlugit qaangiummata Trumpip Kalaallit Nunaat eqqartuleqqippaa.

Aallartitassanik toqqaanermut atatillugu oqaaseqaateqartoq

Tamanna Danmarkimut aallartitassaminik toqqaasimaneranik pissuteqarpoq.

Taanna tassaavoq niuertoq aallarnisaasorlu 49-nik ukiulik Ken Howery, ilaatigut USA-mit Sverigemi aallartitaasimasoq.

- Ken Howeryp USA-p Kunngeqarfimmi Danmarkimi aallartitassatut toqqarsimanera suaarutigissallugu nuannaarutigeqaara.

- Ken aallarnisaasuullunilu, aningaasaliisartuullunilu diplomatiuvoq nunarsuarmi tamarmi ilisimaneqartoq, præsidentiuninnilu siullermi USA-p Sverigemi aallartitaatut maligassiuilluarluni nunatsinnut sullissilluarpoq,“ Trump Truth Social-imi allappoq.

Naalagaaffiup Naalakkkersuisoqarfia oqaaseqartinniaraa

Allaaserisami tulliuttumi Trumpip Kalaallit Nunaat pillugu eqqarsaatini saqqummiuppai, imalu naggasiivoq:

- Ken USA-p soqutigisaanik illersuilluassaaq. Ken qujanaq, pilluarillu!

Ritzau-p Naalagaaffiup Naalakkersuisoqarfia oqaaseqartinniarpaa. Sermitsiattaaq Trumpip oqaaseqaatai pillugit Naalakkersuisut oqaaseqartinniarpai.

USA-p Kalaallit Nunaata issittumi inissisimaffia pissutigalugu soqutigisaraa.

USA-p Kalaallit Nunaat tiguaruniuk nunami najuunnerulissaaq, soorluttaaq Rusland aamma aqutsinissamik soqutigisaqartoq.

ken howery inuiaqatigiit grønland donald trump mette frederiksen usa samfund

ATORFIIT Se alle jobs

Powered by Labrador CMS