USA-mi marlunngornermi
novembarip tallimaanni qinersineq nunarsuarmi tamarmi pissangalluni
malinnaaffigineqarpoq.
Qinersineq sioqqullugu Donald Trumpip aamma Kamala
Harrisip naligeeqalutik unamminissaat ilimagineqaraluarpoq.
USA-mi marlunngornermi
novembarip tallimaanni qinersineq nunarsuarmi tamarmi pissangalluni
malinnaaffigineqarpoq.
Qinersineq sioqqullugu Donald Trumpip aamma Kamala
Harrisip naligeeqalutik unamminissaat ilimagineqaraluarpoq.
Politikikkut
oqaaseqartartut misissueqqissaartartullu qinersineq „qiiaamminartutut“ taavaat,
aamma kina USA-mi præsidentinngussanersoq ullorpassuit qaangiuppata aatsaat
paasineqassasoq ilimagineqaraluarpoq. Sivitsunngitsorli paasinarsivoq Trump
siuaqqasoq, qinersisartunit amerlanerpaanit qinerneqarami aamma qinersisartut sinnerlugit
taasisartunit amerlanerpaanit qinerneqarami. Trump qinersisartut sinnerlugit taasisartunit
276-inik taaneqarami, Harrisilu qinersisartut sinnerlugit taasisartunit 219-inik
taaneqarluni.
USA-mi qinersineq nunarsuarmi
tamarmi pissangalluni malinnaaffigineqarpoq. USA arlalinnik pissuteqartumik
nunarsuarmi pissaaneqarnerpaavoq. Nunarsuarmi aningaasaqarnerpaavoq,
taamaalillunilu nunarsuarmi niuernermut sunniuteqartorujussuulluni. Nunarsuarmi
sakkutooqarnerpaavoq sakkutooqarnermilu teknologiikkut siuarsimanerpaalluni,
nunarsuarmilu tamarmi sakkutooqarfinnut illersornissakkut aningaasaliissuteqarnerpaalluni.
Ilaatigut Pituffimmut.
USA aamma nunat tamalaat akornanni
isumaqatigiissutinut aalajangiisarnernullu sunniuteqartorujussuuvoq, nunat
tamalaat kattuffiini soorlu FN-imi, NATO-mi aamma Verdensbankenimi siuttuugami.
USA-p nunarsuup immikkoortuini inissisimaffia aamma
pingaaruteqarpoq, tamatumanimi illuatungeriinnik imavinnut inissisimaffeqarami,
taamalu niuernikkut imaatigut aqqutinut pingaarutilinnut aqquteqarluni.
Trump qanoq iliorniarnersoq nalunartarpoq. Siornatigut
Nunarput pisiariniaraluarpaa, Nunatsinni pinngortitap pisuussutaannik
aatsitassarsiorfiusinnaasunillu takunnissimagami, aammali sakkutooqarnikkut periaasissanut
inissisimaffiata pingaaruteqarnera pissutigalugu.
Naalakkersuisut siulittaasuat Múte B. Egede
Sermitsiaq.gl-imut oqarpoq, USA-mik suleqateqarnerup suli
ineriartortinneqarnera pingaartilluinnarini, nunallu taakkua akornanni
suleqatigiinneq piviusunngortinniarlugu ilungersuutigineqartoq, pingaartumik
Joint Committee aqqutigalugu. Joint Committeemi Nunatta USA-llu akornanni
siunissami niuernikkut aqqutit siusinnerusukkut oqaluuserineqarsimapput,
taamaattumik Trumpip Nunarput suli soqutigippagu, periarfissanik
ammartoqarsinnaassaaq.
USA Nuummi 2020-mi konsuleqarfeqalerpoq, tamatumalu
malitsigisaanik Amerikamiut Nunatsinniittut amerlanerulerlutik. Suleqatigiinnerup
nukittorsarneqarnissaa aamma Nunatta USA-llu akornanni ilinniartitaanerup,
takornariaqarnerup, nukissiuuteqarnerup, niuernerup aamma aatsitassarsiornerup
iluani suleqatigiinnerup annertusarnissaat siunertaavoq. Ilaatigut inuusuttut
amerlanerusut USA-mi ilinniagaqarsinnaalernissaannut periarfissanik nutaanik
pilersitsivoq, USA-mimi ilinniartitaanerup ilisimatusarnerullu iluani aamma
nunarsuarmi universitetit ilisimatusarfiillu siuttuusunik ilaqarmata,
nunarsuarmit tamarmeersunit ilinniartorpassuarnit kajungerineqartut.
Amerikamiut qinersisartut aalajangeereerput.
Qinersinerallu ataqqisariaqarparput. Trump nalunngereerparput, nalunngilarpullu
siumut oqaatigineqarsinnaanngitsunik iliuuseqartartoq sakkortuunillu oqaaseqartartoq.
Aammali nalunngilarput Trump atorfilittarpassuaqartoq, taakkulu nunanik
suleqatigisaminnik suleqatiginninnerup pitsaasup ingerlatiinnarnissaa
pingaartitaraat, Nunarput taakkununnga ilaavoq.
