KL

DK

Trumpi Kalaallit Nunaannut: Takoqqiliivippugut — PIAARTUMIK!

Amerikap præsidentissaa, Donald Trump, Kalaallit Nunaannut kingumut inuulluaqqusivoq. Tamatumuuna inuulluaqqussutaa paasineqarsinnaavoq nammineq tulliani tikissamaartoq. Siumut tikeraassamaarpaa imaluunniit Kalaallit Nunaat pisortatigoortumik tikeraarnissamik isumaqatigiissuteqartoqarpa?

USA-p præsidentissaata, Donald Trumpip timmisartuutaa sapaatip akunnerani matumani tikippoq. Imaassinnaavoq tulliani tikippat Donald Trump nammineerluni nunatsinnut tikikkumaartoq.
Jensine Berthelsen
tusagassiortoq
Saqqummersinneqarpoq

Partii Siumut amerikami præsidentinngortussamut Donald Trumpimut qaaqqusissummik 27. december 2024 nassiussivoq.

Qaaqqusissummik nassiussisoqareersoq ullut qulit qaangiutiinnartut, ernera Donald Trump Jr. tassanngaannaq januarip 7-iani Nuummut tikippoq.

Maanna amerikami præsidentinngussaq inuit attaveqaateqarfianni  nammineq pigisamini "truth social"-imi pasitsassaarisutut nipeqarluni nalunaarpoq, Kalaallit Nunaannut tikeraariataarsinnaalluni - qanittukkut.

Ernerata Trump Jr.-ip Nuummiinnermini nammineq oqaatigigaluarpaa, takornariarluni tikeraarluni. Tikeraarnermi politikkimik oqaluuserisassaqarnersoq aperineqarami akivoq, allat politikkimik oqaluuserinninneq isumagissagaat, namminerlu takornariartorluni tikeraarluni.

Assit video-llu, tusagassiorfinnit Donald Trump Jr.-imillu inuit attaveqaqatigiittarfiisigut siammarterneqartut tikeraarnermi politikkimut tunngassuteqartoq takuneqarsinnaavoq.

Assimi uani MAGA-kasketit Nuummi innuttaasunut Donald Trump Jr.-ip agguaakkai

Siumup siulittaasua, Erik Jensen Sermitsiamut oqaluttuarpoq, partiip qaaqqusissutaa Trumpimit suli akineqarsimanngitsoq, taassumalu ilimaginerarpaa Trumpip præsidentinngortinneqarnissaa sioqqullugu akissutisinissaminik naatsorsuutiginnigatik, præsidentinngortinneqarnissaalu ullut qulit qaangiuppata  pisussaavoq.

Kalaallit innuttaasut atiisigut taaneqanngitsut: Kalaallit Nunaat pisiariuk!

Videoliami Trumpip inuulluaqqussumminut atatillugu saqqummiussaani kalaallit innuttaasut atiisigut taaneqanngitsut arlallit oqaatigaat Donald Trumpip Kalaallit Nunaat pisiarisariaqaraa:

- Guutip pilluaqqulitit, nukittoorujussuuvutit, aammalu asavatsigit! inuusuttuaqqat kalaallit arnat præsidentinngortussamut inuulluaqqusipput.

- Haluu Trump, (aalaterilluni) Kalaallit Nunaat pisiariuk! inuusuttoq kalaaleq angut oqarpoq.

- Amerikami ilaajumavit? (aperisoqarpoq) Aap, ilaajumavugut! Angut inuusuttoq alla akivoq.

- Misigisimavunga angut una aamma taamak isumaqarpoq, Donald Trump Jr. sanilini pillugu oqarpoq, Hotel Hans Egedemi nerisassianik illinnasaarluakkanik nerinerminni, sanilialu sikisaarluni anngaavoq.

- Donald Trumpip Kalaallit Nunaannik pisiarinninnissaa kissaatigaajuk? (aperisoqarpoq)

- Aap, soorunami! Angutit inuusuttut pingasut ataatsimoorlutik akipput.

Angut alla oqarpoq: Donald Trump, Kalaallit Nunaat ikioruk! ...nuna alianaatsorsuaq ikiorneqartariaqarpoq!

Trumpimik illersuisoq isumaqarpoq Danmarkip Kalaallit Nunaat sumiginnaraa, aamma Kalaallit Nunaata nammineq akisussaaffigisai pillugit.

Angut alla oqarpoq, Trumpip Kalaallit Nunaat pisariaqaraa ilinniartitaanermut peqqinnissaqarfimmullu aaqqiissutissanik pilersitsisoqartariaqarmat, aamma "danskit Kalaallit Nunaannik sumiginnaanerat" pissutigalugu.

Inuit allat amma aterminnik taaneqangitsut video-mi takuneqarsinnaapput, taanna video præsidentinngortussap nammineq attaveqaqatigiittarfiani sisamanngornermi saqqummiussaani.

Charlie Kirkip kalaallit danskinit aniguisikkusukkai

Tamannali sioqqullugu, Donald Trump Jr.-ip Kalaallit Nunaannut angalanerani peqataasoq, Charlie Kirk, amerikamiu qanganisarsiortumik politikernermik ingerlatsinissamik siuarsaaniaqataasoq, atuakkiortoq aammalu attaveqaqatigiittarfinni ilisimaneqartoq, nalunaaquttap akunnerini tallimangajanni Nuummiinnermini ilikkarsimasaminik YouTube-mi video-mik saqqummiussivoq.

Taanna oqaluttuarpoq, kalaallit danskit iluarinngikkaat aammalu danskit kalaallit erloqitikkaat.

Kingorna oqaluttuarpoq, angut nunaqarfimmit Nuup Kujataaneersoq (Qeqertarsuatsiaat, aaqq.) assinik takutitsisimasoq rubinisunik tennissip arsaaraatut angissusilinnik rubininik, angullu taanna oqaluttuarsimasoq Danmarkip tungaanit inerteqqutigineqartoq kalaalli erlinnartunik piiaasinnaanerannik.

Tamakkuupput ilaatigut piffissami matumani USA-mi siammarterneqangaatsiartut.

"Trump Force One" tulliani tikissava Donald Trump ilaasoralugu?

Amerikamiut præsidentissaaat, nammineq attaveqaqatigiiffimmini "see you again - SOON!" (takoqqiliivippugut - PIAARTUMIK!) nalunaarutigaa, oqaatiginngilaali, Kalaallit Nunaannut tikeraarnissaminut piffissamik immikkoortitsisimanerluni.

Taamaattoqassappat, Siumut, imaluunniit Kalaallit Nunaat pisortatigoortumik imaluunniit isumassarseriataarnerinnarminik nunatsinnut tikeraassava? Nalunarpoq, kisianni nunanut allanut tunngasunut naalakkersuisoqarfimmi pisortaq Mininnguaq Kleist Sermitsiamut oqaluttuarpoq, Kalaallit Nunaat Namminersornerullutik Oqartussat aqqutigalugit tikeraarnissamik kissaateqarnermik nalunaarfigineqarsimanngitsut.

donald trump inuiaqatigiit trump-besøg usa samfund

ATORFIIT Se alle jobs

Powered by Labrador CMS