Trumpi pillugu misigissutsit assigiinngitsut

Donald Trump amerikami præsidentitut aappassaanik 20.januar ivertinneqassaaq.

Taassumalu piffissami kingulllermi Kalaallit Nunaanut soqutiginnilluni oqaaseqartarnera, kiisalu Naalakkersuisut amerikamiunik siunissami suleqateqarnissamut ammanerat pillugu, Qeqertarsuarmi innuttaasut qanoq isumaqarnersut Sermitsiamiit aperaagut.

Ole Tobiassen, kommunimi teknikkeqarfimmi sulisoq:

- Amerikamiut Kalaallit Nunaanut soqutiginninnerat siullermiilinngílaq. Sorsunnersuup aappaata nalaani qallunaat nutaata Ivittuuni orsugiak annertoorujussuaq amerikamiunut tuninikuuaa. Nunatsinniullu tikilluaqqusinerput inussiarnisaarnerpullu atornerlullugu, amerikamiut aatsitassanik piaalernissaat siunissami pinaveersimatittariaqarparput. Taamaattumik aatsitassat pillugit Naalakkersuisut amerikkamiunik suleqateqarnissamut ammanerat akuersaaruminaatsippara.

Simigaq Heilmann, sunngiffimmi pisortaq:

- Siullertut nunatta naalagaaffinngornissaa anguniarparput, soorlu aamma nunaqqatigut Canadami amerlanerussutillit taama isumaqartut. USA-p soqutiginninnera eqqarsaatigalugu suleqatigisinnaaneri niueqatigiinnerullu annertusarnissaanut periarfissat atorluarnerussagigut isumaqarpunga. Siumulli siulittaasuata Erik Jensenip eqqarsaatigilluagaanngitsumik Trump-imut tikilluaqqusinera eqqumiigaara, taamatullu aggersaaginnarneq ernumanartoqartippara.

Larseeraq Berthelsen, katersugaasivimmi ikiorti:

- Donald Trumpip nunatsinnut soqutiginninnera USA-mik assigiinngitsutigut suleqateqarnissamut periarfissanik ammaassissaaq, akerlianilli Trumpip ataqqinnissuseqanngitsumik Kalaallit Nunaanut inuinullu pissusilersornera akuersaarsinnaanngilluinnarpara. Piffissami kingullermi amerikamiut politikkikkut peqqarniitsumik pissuseqarnerat mianersorfigisariaqarparput, nunanillu allanik suleqateqarsinnaanissarput periarfissaammat aamma tamanna eqqaamasariaqarparput.

Johanne Wille, pisiniarfimmi sulisoq:

- Donald Trumpip nunatsinnut soqutiginninnera ajorinngilara, piffissamilu aggersumi nunaqarput USA-lu suleqatigiilissappata, tamanna ernumanartutut isiginngilara. Nunatsinni nioqqutissat akisoorujussuupput, taamaattumik niuernikkut USA-mik suleqateqarsinnaanissaq immaqa uatsinnut iluaqutaasinnaavoq. Donald Trumpilli piffissami kingullermi pissusilersuutai meerarpaluppallaartut isumaqarpunga.

Ole Martinsen, siusinaartumik sulisinnaajunnaarnersiutilik:

- Donald Trump amerikamiullu piffissami kingullermi nunarput pillugu soqutiginnileriataarnerat eqqarsarnartoqartippara. Trump politikkikkut peqqarniitsumik ingerlatsisuuvoq, sakkulersorlunilu nunatta tigusinnaanissaa eqqaanikuua. Taamaattumik Naalakkersuisut amerikamiunik suleqateqassappata nunatta siunissaa ernumanartoqartippara.

Sussi Egede, pisiniarfimmi sulisoq:

- Donald Trumpip nunatsinnut ajortumik pissusilersornissaa qularaara. Siunissamut isumalluarnissamut pissutissaqarluartugut isumaqarpunga, taamaakkaluartorli Donald Trump qanoq pissusilersorsinnaanersoq qularnaatsumik ilisimannginnatsigu inuk taanna mianersuuttariaqartoq isumaqarpunga. Danmarkimut attaveqarnerput pitsaavallaarunnaarnikuuvoq, piffissamilu kingullermi politikkikkut uiverneq nunatta USA-llu suleqatigiilersinnaanerannik ammaassissasoq neriuutigaara.