Trumpimut Kalaallit Nunaat Issittorlu pillugit ataatsimut aaqqiissuteqarnissaq Natop pisortaata ilimasaarutigaa

Natop generalsekretæriata Mark Ruttep Issittumi isumannaallisaanerup nukittorsarnissaanut ataatsimoorluni aaqqiissutissaq ilimasaarutigaa.

Bruxellesimi EU-mi naalagaaffiit naalakkersuisullu siuttuilu ataasinngornermi ataatsimeeqatigineranni oqarpoq.

Ataatsimiigiarnerani Trumpip killeqarfiit atuuttut allanngortikkunniarlugit pissaanermik atuissappat Natop Danmark qanoq illersorumaaraa aperineqarami Rutte ima akivoq:

- Danmark iligallu tamaasa pitsaasumik oqaloqatigisarpavut. Avannaarsuata tamarmi iliuuseqarneqarnerunissaanik Trumpip oqarnera ilumoorpoq.

- Kalaallit Nunaannaanngitsoq aammali Island, Norge, Finland, Sverige, Canada USA-lu pineqarput. Taamaattumik nunat avannarpasinnerusut illersorneqarnerat qulakkeernissaannik iliuuseqarnerusariaqarpugut, Mark Rutte oqarpoq.

Natop Issittumi annertuumik annertusaasoqarnissaa USA-p præsidentianut Donald Trumpimut siunnersuutiginiaraa, Nato-mi paasissutissiisunik aallaaveqarluni tyskit nutaarsiassaqartitsiviat dpa tallimanngornermi allappoq.

Kalaallit Nunaata naalagaaffeqatigiinnermut ilaanerata tungaatigut isumaqatigiinngissutit qaangerniarnissaat anguniarneqarpoq.

Danmarkip killeqarfii ataqqineqassasut Danmarkip EU-milu nunat allat erseqqissumik oqariartuutigisaraat kunngeqarfiup ministeriuneq Mette Frederiksen (S) Bruxellesimi ataatsimiinnissamut aallalernermini nunanit tamalaanit tusagassiortunut oqarpoq.

Issittumi sakkutooqarnerulernissaa ammaffigaa:

- Illersornissaq isumannaallisaanerlu eqqarsaatigalugit issittoq pingaaruteqarneruleraluttuinnarneranik Amerikamiut isumaat isumaqatigilluinnarpara.

- Danmarkip Natollu sumiiffimmiinnerunissamik piumassuseqarput, taamaattumik nunarsuup ilaanik uagut isumannaallisaanerput pineqarpat, taava siuariartornissamut periarfissarsiorsinnaavugut, Mette Frederiksen oqarpoq.

Trumpip Kalaallit Nunaat USA-p pisiarisinnaaneraa siunnersuutiginikuua. Isumannaallisaanermut aarleqqutigalugit tunngavilersuutigalugu.

Kinamiut Ruslandillu nunap immikkoortuanniinnerat pissutigalugu aarleqqutigineqartoq pissutissaqarluartoq Natomi isumaqartoqarpoq. Taamaattumik Natop siunnersuutaa præsidentip akuuffigilerumaarpaa. USA suliniummut aamma peqataasinnaavoq.

Natomi tusarfiup dpa-mut oqaatigaa siunnersuut "pisortatigoortuunngitsumik oqaloqatigiissutigineqartoq“.

Kalaallit Nunaat Amerikamit oqartussaaffigilerumallugu sakkutooqarnikkut aningaasatigullu pinngitsaaliilluni iliuuseqarusulluni Donald Trumpip siusinnerusukkut oqariartuutiginikuuaa.

USA-lli nunanut allanut ministeriata Marco Rubiop sapaatip-akunnerani kingullermi sisamanngornermi radiukkut apersorneqarnermini sakkutuulersorniarnermut apeqqut pillugu pimoorussisoqannginneraavoq.

Rubioli aamma oqarpoq Trumpip Kalaallit Nunaannik oqartussaaffigilerneranik kissaateqarnera "piaarinerunngitsoq“.

- Taanna niuertuuvoq politikkimut akuliunnikoq. Politikkeriunngilaq politikkimut akuliuttoq. Taamaattumik makku apeqqutit niuertutut periuseqarluni iliuuseqarfigisarpai, Rubio oqarpoq.

- Taamaattumik inissisimaffimminut iluaqutini aningaasaliissutit isumaqatiginninniarluni imaluunniit oqaloqatiginnilluni mattunnavianngilai, Rubio naliliivoq, præsidentillu pinngitsaaliiniarluni sakkutuunik atuinissaq periarfissatut atorsinnaagaa ilanngullugu oqaatigalugu, Rubio oqarpoq.

USA Pituffimmi maanna sakkutooqarfimmiippoq. USA-p Danmarki Kalaallit Nunaallu apereqqaarnagit sakkutooqarfimmiinnini annertusisinnaavaa.

USA-p Kalaallit Nunaanniinneranut tunngatillugu 1951-imi Danmarkip USA-llu illersornissaq pillugu isumaqatigiissutaat tunngavigalugu USA annertuumik oqartussaaffeqareerpoq.

Isumaqatigiissut naapertorlugu USA-p Natop ataani Danmark Kalaallit Nunaannik illersuineranik ikiortussaavaa, USA-lu Kalaallit Nunaannit killeqanngitsumik isersinnaalluni.

/Ritzau/