Trumpip aamma Putinip qanittukkut naapinnissaat Ruslandip uppernarsarpaa
Amerikami tusagassiorfinnit allaaserinnillattaartoqareersorlu Ruslandip præsidentiata siunnersortaa Trumpimik naapitsineq pissasoq uppernarsarpaa.
Assimi takuneqarsinnaapput Trump aamma Putin G20-mi ataatsimiinneranni Argentinami 2018-imi. Maanna siunnersortip oqarnera naapertorlugu ukiuni arlalinni siullermeerlutik naapeqqittussaapput.
Arkivfoto: Marcos Brindicci/Reuters
Isumaqatigiissutaavoq USA-p præsidentiata, Donald Trumpip, Ruslandillu præsidentiata, Vladimir Putinip, akornanni "ulluni aggersuni" ataatsimeeqatigiittoqassasoq.
Ruslandip præsidentiata siunnersortaa Jurij Usjakov sisamanngornermi, Ruslandip nutaarsiassaqartitsivia Interfax naapertorlugu taamatut oqarpoq .
Taamaalilluni amerikami præsidentip Ruslandillu præsidentiata ukiut sisamat sinnerlugit qaangiuttut siullerpaamik ataatsimeeqatigiinnerat piviusunngussaaq. Trumpip siulia, Joe Biden, Putinilu Schweizimi 2021-mi naapipput.
USA Ruslandilu ataatsimeeqatigiinnermi pisussat pillugit sulillutik aallartereerput, ilanngullugu oqaatigineqarpoq. Piffissaq aalajangersimasoq suli oqaatigineqanngilaq.
Taamatuttaaq isumaqatigiissutaavoq sumi naapeqatigiissanersut, kisianni aatsaat kingusinnerusukkut saqqummiunneqassaaq sumerpiaq naapinnerat pissanersoq, Usjakov oqarpoq.
- Amerikamiut siunnersuinerat malillugu isumaqatigiissutaavoq ulluni qaninnerni ataatsimeeqatigiinneq nunat marluk akornanni qaffasissumik ingerlanneqassasoq, tassa præsident Vladimir Putinip Donald Trumpillu akornanni ataatsimeeqatigiinneq, Usjakov tv-mi aallakaatinneqartumi oqarpoq.
- Piareersarnerit maanna aallartippagut amerikamiut suleqatigut peqatigalugit, taanna nangippoq.
Usjakovip uppernarsaanera takkuppoq, ullut marluk qaangiuttut amerikamiut aviisiisa arlallit isertuussanik paasissutissanik tunngaveqarlutik allaaserinnereersullu, præsidentit marluk akornanni ataatsimeeqatigiinneq sapaatip-akunnerata tulliani pisussanngortoq.
Taava Trumpip kissaatigaa naapeqatigiinnermi tassani nammineq, Putin aamma Ukrainemi præsidentia, Volodymyr Zelenskyj, peqataassasut.
Marlunngornermi amerikamiut immikkut ittumik aallartitaat Steve Witkoff Moskvami Putinimik naapitsivoq.
Tassani siunnersuutigaa naapeqatigiinneq pissasoq naalagaaffiit pingasut taakku aqutsisunik peqataaffigisaannik, Usjakov oqarpoq, kisianni siunnersuut taanna Ruslandimi naalakkersuisut "oqaaseqarfigisinnaanngilluinnaraat."
- Siullermik - siunnersuutigaarput - Trumpimik ataatsimeeqatiginninnissaq naalagaaffiit marluk taakku akornanni pissasoq, aammalu isumaqarpugut ataatsimiinnerup angusaqarfiulluarnissaa pingaarnerpaajusoq, siunnersorti oqarpoq.
Witkoffip Putinilu naapereerneranni Trumpip attaveqaqatigiiffimmini, Truth Socialimi, allappoq "angusaqarluartoqartoq".
