Trumpip Alaskami qaqqaq allatut atsersiniaraa — nunap inoqqaavisa taaguutaat peerneqassapput
Alaskami qaqqarsuaq nunap inoqqaavisa taaguutaat Denali atornagu Mount McKinleymik atserneqaqqissasoq Donald Trump isumaqarpoq.
2015-imi præsidentiusimasup Barack Obamap Amerikap Avannaani qaqqat portunersaata aqqa nunap inoqqaavisa taaguutaannik, Denalimik, taaguuteqaqqilerlugu allanngortippaa.
Assiliisoq: Jonathan Ernst/Reuters
USA-mi præsidentinngortussap Donald Trumpip Amerikap Avannaani qaqqat portunersaat Denali allatut atserniarpaa.
Donald Trump sapaatiummat ukiumoortumik ataatsimeersuarnermi AmericaFestimi, ileqqussatigut isummanik allanngortitsinnginnissamik suliniaqatigiiffimmit Turning Pointimit aaqqissuunneqartumi, taama oqarpoq.
Trumpilli Alaskami qaqqarsuaq USA-p præsidentiisa 25-at, William McKinley, 1901-imi toqutaasimasoq, atsiullugu atserniarpaa.
Taamaalilluni præsidentinngortussaq ukiuni qulikkuutaani taaguut pilluugu akerleriissutaasimasumut akuliutissaaq.
Qaqqaq taanna pisortatigoortumik Mount McKinleymik atserneqarsimavoq, 2015-imili præsidentiusimasup Barack Obamap Denalimik taaguuteqalersippaa.
Denali, isumaqartoq „qutsinnerusoq“, Alaskami nunap inoqqaavisa qaqqamut taaguutigaat.
Qaqqaq Alaskamiittoq 1975-imili pisortatigoortumik Denalimik taaguuteqarpoq.
Qaqqaq kuultisiortup 1896-imi Mount McKinley-mik taaguuserpaa. Kuultisiortup McKinley Republikanerit partiiannit præsidentinngorniartussatut qinigassanngortinneqarsimasoq tusarsimavaa.
William McKinley 1897-imiit 1901-imi toqussi tikillugu USA-mi præsidentiuvoq.
- Aqqa Mount McKinleymiit peerpaat. Præsidentitsialaavoq, DOnald Trump sapaatiummat oqarpoq.
McKinley Trumpip isiginnittaasia naapertorlugu "ataqqineqartariaqarmat Naalakkersuisut qaqqap taaguutaa Mount McKinley uterteqqinniarpaat.
Qaqqaq taanna 20.000 fodit sinnerlugit portussuseqarpoq, tassa 6,1 kilometerinit portunerulluni.
/ritzau/Reuters
