Trumpip parteeqatini FN-imi aallartitatut toqqarpaa

USA-p præsidentissaata Donald Trumpip Elise Stefanik USA-p FN-imi aallartitassaatut toqqarpaa.

AFP naapertorlugu New York Postimut taama oqarpoq.

Elise Stefanik USA-mi Repræsentanternes Husimi republikaneruvoq, partiimilu talerperlernut ilaavoq.

- Elise sorsuttartuuvoq nukittullunilu, qasusuitsuullunilu silatooq Amerikamik salliutitsisoq, Trump ilaatigut oqarpoq.

Elise Stefanikip atorfik taanna akueralugu aviisimut oqaaseqarnermini aamma uppernarsarpaa.

Uani allassimavoq "ataqqinaataasoq".

- Præsident Trump oqaloqatigigakku toqqarneqarnera ataqqingaarlugu, aamma Senatimi suleqatinnit tapersersorneqarnissara qilanaaralugu oqaatigaara, oqarpoq.

2020-mi ukioq mannalu Trumpip præsidentinngortussatut kina tullersortigiumaarnerlugu toqqarnialermagu atia taaneqarpoq. Taarsiullugu J.D. Vance USA-mi præsidentip tullissaatut toqqarneqarpoq.

Trumpip 2025-mi januaarimi præsidentinngornissani sioqqullugu atorfiit pingaarutillit arlallit inuttalersorpai.

Siulliit ilaattut Susie Wiles Det Hvide Husimi pisortatut toqqarpaa.

Taamaalilluni Wiles USA-mi arnani siullersaalluni atorfimmi pissaaneqarfiusumi atorfinissaaq.

Wiles 67-inik ukiulik Donald Trumpip qineqqusaarnerani siuttuunikuugami qitiusumik inissisimaffeqarsimavoq.

Politiiusimasoq Tom Homan USA-p killeqarfiini nakkutilliisunut pisortanngorpoq, tamannalu qinersinermi pingaarnertut oqaluuserineqarmat pisortaaneq atorfiuvoq pingaarutilik.

FN-imi aallartitaasimasoq Nikki Haley aamma nunanut allanut ministeriusimasoq Mike Pompeo USA-p naalakkersuisussaani atorfeqassanngitsut Trumpip nalunaarutigaa.

Nikki Haley Trumpip 2017-imiit 2021-mut præsidentiunerani USA-p FN-imi aallartitaatut atorfeqarpoq.

Linda Thomas-Greenfield maanna USA-p FN-imi aallartitaatut atorfeqarpoq. Præsident Joe Bidenimit toqqarneqarluni februaarimi 2021-mi atorfinippoq.

/ritzau/