Trumpip pissaaneqarnerujartornera nunanut allanut sukannernerusumik politikkeqarnissamik periarfissiivoq
Piginnaassutsip nukittorsarnera Donald Trumpimut periarfissiivoq politikkimik avammut saatsinerusumik maanna ingerlatitseqqiinissamut, oqarpoq.
Assiliisoq: Mandel Ngan/AFP/Ritzau Scanpix
Donald Trumpip præsidentitut aappassaanik atuuffimmini pissaaneqarnerujartornera nunanut allanut politikkimik "sukannernerusumik“ Amerikap anginerulernissaanik siunertalimmik ingerlatsinissamut periarfissiivoq.
Qallunaat nalunaaqutaat malillugu ataasinngornerup unnuaani timmisartumi Air Force Onemi tusagassiortunik arlalinnik apersorneqarluni oqarpoq. Tusagassiorfiup Forbesip apersuineq YouTubemut ilivaa.
Trumpip Kalaallit Nunaata akisussaaffigilernissaanik kissaateqarnini tassani aamma uteqqippaa.
- Piumasara malillugu iliornissamut piffissaqarneruvunga, Donald Trump oqarpoq.
USA-p præsidentiata Kalaallit Nunaat, Canada kiisalu nalunaarutaa kingulleq Gaza ilanngullugu nuna allissasoq naqissuserpaa.
Nunanut allanut politikkiani nutaami tamanna aalajangiusimalluinnarpaa.
Tamanna Amerikap siulliunneqarnissaanik oqariartuummut qanoq naapertuunnersoq tusagassiortup Donald Trump aperaa.
- Annerulissaagut, nikuttunerulerluta pitsaanerulerlutalu, præsidenti akivoq.
USA-p Kalaallit Nunaannik piginnittussaaneranik qulakkeerinninnissaminut tunngavilersuutini uteqqippai.
- Kalaallit Nunaat nunap isumannaatsuunissaanut pisariaqartipparput — nunat tamalaat isumannaatsuunissaat, nunarsuarmi eqqissineq. Tamakku anguniarlugit pisariaqartipparput, Donald Trump oqarpoq.
Donald Trump præsidentiuffimmini siullermi 2017-imiit 2021-mut sulinermini Demokraatinit aaqqissuussaanermiillu akerlilersorneqartuarpoq, nassuiaavoq.
- Uannut sakkortusaarsimapput, oqarpoq.
Akiuussinnaajumalluni "aniguiniarluni" piffissarujussuaq atortariaqarsimavaa.
Maannakkulli pissaaneqarnerulersimavoq, akerlilersuisullu sakkukinnerulersimallutik, oqarpoq.
- Tutsuiginarunnaarput imminullu tatigiunnaarlutik, Donald Trump oqarpoq.
Pissaaneqarnerulerneq USA-mik "annerulersitsillunilu pitsaanerulersitsissaaq".
Aammattaaq Canada USA-mut ilanngunneqarnissaa kissaatigineqarpoq.
Naalagaaffik taamaattoq "qujamasuutigineqartorujussuussaaq", oqarpoq. Donald Trumpip isiginnitaasia malillugu nunat taakku marluk akornanni killeqarfik titarnerinnaavoq.
- Nuna asuliinnaq titarneqarsimanngitsuuppat qanoq kusanartigissagaluarnersoq takorlooruk. Ukiorpassuit matuma siorna titartaammik titapajuunnarneqarnikoq - titarnerinnaq, oqarpoq.
