Tunisisinnaaneq attatiinnarniarlugu millionikkaanik tapiissuteqartoqartoq
Puisit amiinik tunisisinnaanerup ingerlaannarnissaa anguniarlugu Naalakkersuisut 3 millionit koruuninik tapiissuteqarnissaq akueraat.
Great Greenlandimut ukiup sinnerani amernik tunisisoqarsinnaanissaa qulakkeerniarlugu 3 millionit koruuninik tapiissuteqartoqaqqippoq.
Assi: Leiff Josefsen
Great Greenlandimut puisit amiinik tunisat 2024-mi 31 procentimik amerleriarujussuarsimapput, taamaattumillu Naalakkersuisut tunisineq ingerlaannaqqullugu suliffeqarfimmut 3 millionit koruuninik aningaasaliiffiginiarlugu aalajangerput.
Great Greenland puisit amiinik nuna tamakkerlugu tunisiffigineqarsinnaavoq, tunisiffigineqarsinnaaneralu tapiiffigineqartarluni. Tapi piniartumut amermik tunisisisumut tuttarpoq.
Aningaasanut inatsimmi Great Greenland 2024-mi 26,7 millionit koruuninik tapiiffigineqarsimasoq takuneqarsinnaavoq.
Inatsisartut Aningaasaqarnermut Akileraartarnermullu Ataatsimiititaliaata 3 millionit koruuninik immikkut aningaasaliissuteqarnissaq akuerigaa Naalakkersuisut tusagassiuutinut nalunaarummi marlunngornermi ilisimatitsipput.
Naalakkersuisoq Naaja H. Nathanielsen (IA) ataatsimiititaliap suliamik suliarinnipallassimanera pillugu qujavoq:
- Ukioq naallugu puisit amiinik tunisisinnaanissap pingaaruteqassusia ilisimagatsigu, ukioq naallugu tunisisoqarsinnaanissaa Naalakkersuisut qulakkeerusussimavaat.
- Ajornartorsiutaasoq piaartumik aaqqiissuteqarfigineqarsinnaanngorlugu, Aningaasanut Akileraartarnermullu Ataatsimiititaliap suliaq piaartumik suliarimmagu qujamasuutigaarput, oqarpoq.
