KL

DK

Tunumi illoqarfiup eqqaani narlumukaarpassuaqartoq

Ittoqqortoormiit eqqaanni massakkut narlumukaarpassuaqartoq Kalaallit Nunaanni Uumasunut Nakorsaqarfik Inuussutissalerinermullu Oqartussaaffiup (UNIO) nalunaarutigaa. Uumasut nujuartat qanillattorneqassanngitsut oqartussat erseqqissaatigaat.

Ittoqqortoormiit
Narlumukaarpassuit inunnit qanillattorneqassanngitsut Kalaallit Nunaanni Uumasunut Nakorsaqarfik Inuussutissalerinermullu Oqartussaaffiup (UNIO) nalunaarutigaa.
Thomas Munk Veirum Journalisti
Saqqummersinneqarpoq

Ittoqqortoormiit eqqaani maanna narlumukaarpassuaqartoq Inuussutissalerinermullu Oqartussaaffiup (UNIO) tusagassiuutinut nalunaarummi allappoq.

Perlerortut ersiutaat

Uumasoq perlerulersimaguni qisimigut viruseqalersarpoq, taannalu kiisinermigut tunillaassutilertarpoq imaluunniit assaat ikeqarsimappata ikikkoorlugu tunillaassuussinnaasarluni.Uumasoq tunillatsissimasoq perlerornermik nappaammik ersiuteqanngikkaluarluni sapaatip akunnerini arlalinni tunillaassuisinnaasarpoq.

Uumasut perlerortut nalinginnaasumik ilisarnaatigisarpaat:

    • Tassanngaannaq saassusseriartarnertik aamma qaasoriartarneq

    • Allatut pissuseqalerneri soorlu uumasunut nujuartanut allanut qunugisaaruttarnerat

    • Nuakoorneq

    • Takorruukkaminnik kiiseriartarnerit

    • Niaqqutik pissusissarinngisaatut inissisimatittarpaat

    • Tamakkiisumik ilaannakortumilluunniit nukillaarsimasarput, pingaartumik alleqqui uppataalu

Kiitissimaguit piaarnerpaamik imermik qaqorsaammillu ikit salissavat piaarnerpaamillu peqqinnissaqarfik attavigalugu. Inuit perlerornermik tunillatsissimasut katsorsarneqanngikkaangamik tunillannertik toqqutigisarpaat.

Paasissutissat: UNIO

Ittoqqortoormiit eqqaanni massakkut narlumukaarpassuaqartoq, uumasullu illoqarfimmiunut qanillattortartut Kalaallit Nunaanni Uumasunut Nakorsaqarfik UNIO allappoq:

- Tamanna tunngavigalugu UNIO-p erseqqissaatigissavaa uumasut nujuartat eqqissimatinneqartussaaneri qanillattoqqusaanatillu. Taamatut erseqqissaasoqarpoq uumasut illersorneqarnissaat tunngavigalugu aamma nappaatinik inunnut tunillaassuuttunik inuit nappaateqalinnginniassammata, UNIO allappoq, uumasunillu illersuineq pillugu inatsit innersuullugu:

- Uumasunik nujuartanik tigumminnittarneq tigusaqartarnerlu Uumasunik illersuineq pillugu Inatsisartut inatsisaat nr. 25, 18. december 2003-meersoq naapertorlugu uumasunik ikiuiniarnerunngippat kiisalu uumasut piaraannik anaanaannit arsaarinninnerit uumasunik naalliutitsinertut isigineqarput inatsimmillu unioqqutitsinerulluni, UNIO allappoq.

Uumasut nujuartat perlerorsinnaasarput allanilluunniit nappaateqarsinnaasartut inunnut tuniluussinnaasoq oqartussat allapput.

- Taamaattumik uumasunut attaveqarnaveersaartariaqarputit tuniluunnerup navianartorsiortinneqarnissaa pinaveersaartinniarlugu, UNIO allappoq.

samfund inuiaqatigiit

Atorfiit tamaasa takukkit

Powered by Labrador CMS