Tusagassiorfik: Aallartitap Kalaallit Nunaat pillugu apeqqutit Trumpip oqariartuutigisartagaanut innersuukkai
Ken Howeryp USA-p pilersaarutai pillugit DR-imit aperineqarami, Donald Trumpip Kalaallit Nunaat pillugu oqaasiinut innersuussivoq.
USA-p aallartitartaava Ken Howery Christiansborg Slotimi kunngimut pingasunngornermi novembarip tallimaani sassareernermi kingorna.
Assi: Mads Claus Rasmussen/Ritzau Scanpix
USA Danmarkimi nutaamik aallartitaqalerpoq. Ken Howery 50-inik ukiulik ippassaq atorfittaaminut suliartorngaarpoq.
USA-p Kalaallit Nunaannut pilersaarutai pillugit DR-imiit arlaleriarluni aperineqarpoq, akissullu ataasiinnaavoq:
- Præsidentip oqaasii uteqqissavakka, tassa USA-miit kalaallit siunissamut namminneq aalajangiisinnaatitaanerat ataqqineqarpoq. Aamma USA-p isumannaatsuunissaa suli pingaartillugu oqarnikuuvoq, ingammik Ruslandip Kinallu nunap immikkoortua pillugu sukakkaluttuinnarnerat eqqarsaatigalugu, Ken Howery DR-imut oqarpoq.
Tusagassiortup Kalaallit Nunaat pillugu apeqquteqaqattaarneranut præsidentip oqaatiginikuusai innersuussutigisaqattaarpai.
Kalaallit Nunaata pigilernissaa pingaaruteqartoq
USA-p Danmarkillu attaveqatigiinnerat pitsaanerulernissaa kissaatigineqartoq, Ken Howeryp pingasunngornermi unnukkut aamma erseqqissarpaa.
Aallartitanngorlaaq Københavnimi Christiansborgimi kunngi oqaloqatigereernerata kingorna oqarpoq.
- Illersornissaq isumannaallisaanerlu pillugit suleqatigiinnerup nukittorsarneqarnissaa, niuernerup aningaasaliinerullu annertusarnissaat kiisalu issittumi – pingaartumik Kalaallit Nunaanni – isumannaallisaanermut tunngatillugu ataatsimut isumakuluutivut pillugit kunngeqarfiup suleqatiginissaa pingaarnerpaatippavut, oqarpoq.
Trump Kalaallit Nunaat aqussinnaalerusullugu oqaatigisaqattaartareernikuuaa. Howeryp atorfimmut siorna innersuunnerani aamma oqaatigaa.
- Nunap isumannaatsuunissaa nunarsuarmilu eqqissineq eqqarsaatigalugit Kalaallit Nunaata piginissaa aqunnissaalu pingaaruteqarluinnarpoq, Trump inuit attaveqaqatigiittarfianni Truth Social-imi taamani allappoq.
