Tusagassiorfik: Natop Trumpip Issittoq pillugu neqeroorutaa naaperiarniaraa

Sakkutooqarnikkut suleqatigiinni Natomi USA-p præsidentianut Donald Trumpimut Natop Issittumiinnerulernissaa pillugu siunnersuisoqarnissaanik oqaloqatigiittoqarpoq.

Tamanna Dpa-p sakkutuut suleqatigiiffiannit tusarfinnit paasivaa.

Kalaallit Nunaata naalagaaffeqatigiinnermut ilaammat isumaqatigiinngissutit qaangerniarnissaat anguniarneqarpoq.

Trumpip isumannaallisaanermut tunngasut pissutigalugit Kalaallit Nunaat USA-p pisiarisinnaaneraa siunnersuutigaa.

Kinamiut Ruslandimiullu nunap immikkoortuaniinnerat pissutigalugu ernumassut tunngavissaqarluartoq Natomi paasissutissiisup oqaatigaa, tamannalu pillugu præsidenti oqaloqatigineqassaaq. Suliniummut USA aamma peqataasinnaavoq.

Tusarfiit naapertorlugit siunnersuut pisortatigoortuunngitsumik oqaluuserineqarpoq.

Dpa naapertorlugu sakkutooqarnikkut annertusaaneq 2023-mi illersornissamut pilersaarutit tunngavigalugit pisinnaavoq.

Donald Trumpip, 2019-imi siullerpaamik Kalaallit Nunaata pisiarinissaanik kissaateqarnerminik oqaaseqaqqaartup, qaammammi matumani siusinnerusukkut Amerikamiut Kalaallit Nunaat aqussinnaalerusullugu pigilerusullugulu sakkutooqarnikkut aningaasatigullu kinguneqartitsisinnaanini tunuarsimaarfiginagu oqaatigaa.

USA-p nunanut allanut ministeriata Marco Rubiop sisamanngormat radiukkut apersorneqarnermini sakkutooqarnikkut pinngitsaaliisoqarnissaanik oqalunneq taama pimoorunneqartiginngitsoq oqaatigaa, aammali Trumpip Kalaallit Nunaannik aqutsinerulernissamik kissaateqarnera "piaaringerunngitsoq" oqaatigalugu.

- Taanna niuertuuvoq politikkimut akuliunnikoq. Politikkeriunngilaq politikkimut akuliuttoq. Taamaattumik makku apeqqutit niuertutut periuseqarluni iliuuseqarfigisarpai, Rubio oqarpoq.

- Taamaattumik inissisimaffimminut iluaqutini aningaasaliissutit isumaqatiginninniarluni imaluunniit oqaloqatiginnilluni mattunnavianngilai, Rubio naliliivoq, præsidentillu pinngitsaaliiniarluni sakkutuunik atuinissaq periarfissatut atorsinnaagaa ilanngullugu oqaatigalugu.

USA Pituffimmi maanna sakkutooqarfimmiippoq. USA-p Danmarki Kalaallit Nunaallu apereqqaarnagit sakkutooqarfimmiinnini annertusisinnaavaa.

USA-p Kalaallit Nunaanniinneranut tunngatillugu 1951-imi Danmarkip USA-llu illersornissaq pillugu isumaqatigiissutaat tunngavigalugu USA annertuumik oqartussaaffeqareerpoq.

Isumaqatigiissut naapertorlugu USA-p Natop ataani Danmark Kalaallit Nunaannik illersuineranik ikiortussaavaa, USA-lu Kalaallit Nunaannit killeqanngitsumik isersinnaalluni.

/ritzau/