KL

DK

Tusagassiortunik katersortitsineq: – Una tamaviaarneq ippassaq aallartinngilaq

Kalaallit Nunaata kissaataanut tunngatillugu Danmarkip sulinera kigaappallaartoq, Naalakkersuisut siulittaasuata Múte B. Egedep (IA) erseqqissaatigaa.

Thomas Munk Veirum
Tusagassiortoq
Saqqummersinneqarpoq

Tallimanngornermi ualikkut statsministeri Mette Frederiksen Naalakkersuisullu Siulittaasuat Múte B. Egede kontaktudvalgimi taaneqartumi ataatsimiinnermut tapiliullugu tusagassiortunik katersortitsipput.

Tusagassiortunik katersortitsinermi Donald Trumpip nunatsinnik nakkutilliillunilu piginnittuunissamik pisariaqartitsilluni oqaaseqarneranut tapiliullugu Kalaallit Nunaata namminiilivinnissamik kissaataa annertuumik sammineqarpoq.

Trumpip oqaatigisaanut tunngatillugu Múte B. Egede ima erseqqissaavoq:

- Qallunaajorusunngilagut. Amerikamioorusunngilagut. Kalaaliorusuppugut.

- Kalaallit Nunaat kalaallit pigaat, nunarsuarmioqatitsinnillu suleqatigiinnerput naleqartitavut aallaavigalugit pissaaq.

Killiffik

Maannakkuugallartoq Danmarkimut attaveqaatit kipineqarnissaat pineqanngitsoq, suleqatigiinnermili allanngortoqartariaqartoq, Naalakkersuisut Siulittaasuata oqaatigaa:

- Taamaaginnartitsineq periarfissaanngilaq. Sivisuumik tamanna erseqqissuliutigisarparput. Aqqummik nutaamik nassaartussaavugut, tamannaliuna ukiortaami oqalugiarninni qitiutikkiga.

Danmarki allanngulaagassanulluunniit kigaappallaartumik ingerlatsisoq, taanna oqarpoq, soorlu Kalaallit Nunaata ukiuni 15-ni sorsuutiginnereerluni Issittumi aallartitassamik maanna toqqaasinnaanngornera. 

- Pisariitsuaqqalluunniit aaqqiiviginiarneri piffissartornarpallaarujussuarpoq.

Uagut isitsinnit pissutsit qivialaarsigit

Takkuttut Kalaallit Nunaat aallaavigalugu eqqarsassasut qinnuigai:

- Atagu pissutsit uagut isitsinnit qivialaarsigit. Nunanut allanut tunngatillugu iliuuseqarsinnaanerujumavugut, nunalli allap pisortaa oqaloqatigissagaangatsigu, qallunaat pinngitsoornani ambassadøriannik najuuttoqartartussaavoq.

Trumpip Kalaallit Nunaannik annertuumik allussineranik maanna pisup aaqqinnissaanut tunngatillugu, statsministeri Mette Frederiksen ukiuni kingullerni siusinnerusumut sanilliullugu Naalakkersuisunik qaninnerusumik suleqatiginnittoqartoq, taamaammallu pisut taamaattut aaqqinnissaannut piareersimalluartoqartoq oqaatigaa.

Taassumalu erseqqissaatigaa, USA-mit soqutiginninneq nutaajunngitsoq:

- Amerikamiut Pituffimmi sakkutooqarfeqarnera sivisoorujussuarmik ingerlareerpoq. Tamanna pivoq 1951-mi illersornissamut isumaqatigissut aallaavigalugu, taannalu tunngavigalugu suleqatigiinneq aamma annertusarneqarsinnaavoq.

- Aamma maluginiarpara Kalaallit naalakkersuisuisa kissaatigigaat amerikamiut suleqatigalugit aatsitassarsiorneq annertusarusukkaat, Mette Frederiksen ilaatigut aamma oqarpoq.

samfund inuiaqatigiit

ATORFIIT Se alle jobs

Powered by Labrador CMS