Tusagassiuinermi Sulisut Peqatigiiffiat soraarartut pillugit: - Pissutsit ernumanartorujussuupput
KNR-imi sulisut 35-t ukiup ataatsip ingerlanerani soraarput. Peqatigiiffik ilaasortanit ernumassuteqartunit saaffigineqartartoq siulittaasoq oqarpoq.
- Ilaasortagut ernummatigaavut, aamma ilaasortanit immikkoortortaqarfinnit tamanit saaffiginnittartoqarmat aamma isumakulunnartoqarpoq, Tusagassiuinermik Suliaqartut Peqatigiiffianni siulittaasuugallartoq Arnaq Nielsen oqarpoq.
Leiff Josefsen
Ukiup ataatsip ingerlanerani soraarniutit:
Maj 2023:
Juuni 2023:
- Nutserisoq ataaseq
- Tusagassiortut paarlatsit marluk
Juuli 2023:
- Teknikeri ataaseq
- Tusagassiortut pingasut
August 2023:
- Tusagassiortoq ataaseq
- Pisortaq ataaseq
September 2023:
- Teknikerinngorniaq ataaseq
Oktober 2023:
Novembari 2023:
- Meeqqanut inuusuttunullu immikkoortortaqarfimmi aaqqissuisoq
Decembari 2023:
- Teknikeri ataaseq
- Nutaarsiassaqartitsivimmi pisortaq
- Tusagassiortut sisamat
Januaari 2024:
- Teknikeri ataaseq
- Teknikerinngorniaq ataaseq
- Tusagassiortoq ataaseq
Februaari 2024:
Marsi 2024:
- Tusagassiortoq ataaseq
- Aningaasaqarnermut pisortaq
- Aallakaatitassiortoq saqqummiisartuutigisoq ataaseq
Apriili 2024:
- Meeqqanut inuusuttunullu immikkoortortaqarfimmi aaqqissuisoq
- HR-imi sulisoq
- Tusagassiortoq ataaseq
Maaji 2024:
- Radiomi pisortaq
- Naatsorsuuserisoq ataaseq
- Tusagassiortut marluk
- Aallakaatitassiortoq saqqummiisartuutigisoq (Meeqqanut inuusuttunullu immikkoortortaqarfik)
KNR-imi sulinermi atugassarititat pillugit Tusagassiuinermi Sulisut Peqatigiiffiat (TP) KNR-imi sulisut atugaat pillugit ilaasortanit arlalinnit saaffigineqarsimavoq. Siulittaasoq Arnaq Nielsen KNR-imi pissutsinik ernummatiginnittoq taama oqarpoq.
- Ilaasortagut ernummatigaavut, aamma ilaasortanit immikkoortortaqarfinnit tamanit saaffiginnittartoqarmat isumakulunnartoqarpoq, Arnaq Nielsen oqarpoq.
Pissutsit immikkut ittuusut Arnaq Nielsenip nassuiarpaa. Taannami TP-mi siulittaasuunermi saniatigut aamma KNR-imi atorfeqarami. Taamaattumik tusagassiivik ataatsimut isigalugu taamaallaat oqaaseqarsinnaavoq.
- Oqaannarsinnaavunga suliffitsinni pissutsit ernumanartut pillugit saaffigineqartartugut, amerlasuullu soraartartut.
- KNR-imut inuiaqatigiinnullu tamanut ilungersunarpoq, tassami tusagassiuutit sulisut ikippallaarnerat pissutigalugu suliassaminnik naammassinnissinnaannginnerat Kalaallit Nunaanni innuttaasunut eqquivoq, Arnaq Nielsen oqarpoq.
Ajornartorsiut siaruaakkiartorpoq
TP-p KNR-imi pissutsit qanimut malinnaaffigai. Arnaq Nielsenilli erseqqissarpaa maannakkut tamanna KNR-imi sulisut sinniisaannut, aqutsisunut siulersuisunullu suliassaasoq.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit siunissami taamaallaat
atuarneqarsinnaajumaassapput.
Atuarluarna.
- Siulersuisut aqutsisullu ajornartorsiutinik aaqqiinissaat naatsorsuutigaarput, uaguttaaq soorunami qanimut malinnaavugut.
- Soraartut taama amerlatigimmata pissutsit erloqinarput. KNR-imi pissutsit ajortumut ingerlanerat ernumanartoq isumaqarpunga, Arnaq Nielsen oqarpoq.
TP Arnaq Nielsenilu KNR-imi pissutsit pillugit ukioq manna siusinnerusukkut toqqaannartumik allagaqarput. Taamanikkut nutaarsiassaqartitsivimmi tusagassiortut tallimat amigaataapput. Sulisussaaleqineq immikkoortortaqarfiit sinnerinut maanna siuaruaassimavoq.
- Radiomi aamma ernumapput. Radiomi pisortap soraarniuteqarnera malugineqarsinnaavoq. Tamanna KNR-imi eqqissiviilliornerulernermik nalorninerulernermillu kinguneqarpoq, Arnaq Nielsen oqarpoq.