Tusarfiit: Trumpip Putinimik naapitsinissani taamaatiinnarpaa ruslandimit allagarsiaqareernerup kingorna
Tusarfiit aterminnik saqqummiinngitsut oqarput, Trumpip Putinimik ataatsimeeqateqarnissani taamaatiinnarpaa, Rusland isumaqatigiinniarnissamut piumassuseqarnermik ersersitsinngimmat.
USA-p præsidentia, Donald Trump, tusarfiit naapertorlugit Ruslandip præsidentia, Vladimir Putin, naapinnissaa taamaatippaa, Ruslandip Ukrainemi sorsunnersuarmut tunngatillugu piumasaminik allannguinngimmat.
Assiliisoq: Evelyn Hockstein/Reuters
Budapestimi ataatsimeeqatigiinnissaq USA-p præsidentiata, donald trumpip, aamma Ruslandip præsidentiata, vladimir putinip akornanni pisussaagaluaq taamaatiinnarneqarpoq, USA-p Ruslandimit nalunaarusiaq tigummagu, tassanimi Rusland nalunaarpoq, Ukrainemut tunngatillugu piusaqaatini allanngortissimanngikkai.
Malitsigisaanik aamma nunat taakku nunanut allanut ministerii najummatsisimaqalutik ataatsimeeqatigiikkaluarput.
Tusarfiit aterminik ersersitsinngitsut Financial Times-imut taamak oqarput.
Finansiel Times-ip allaaserisaata paasissutissartai nutaarsiassaqartitsiviup Reutersip imaaliallaannaq uppernaatissarsiffiginngilaa.
Qaammatip siuliani Trump aamma Putin isumaqatigiipput Ungarnimi illoqarfiit pingaarnersaanni, budapestimi, naapinniarlutik Ukrainemilu sorsunnerup naammassineqarnissaa pillugu oqaloqatigiinniarlutik.
Ullut arlallit qaangiummata Russit nunanut allanut ministeriaqarfia USA-mut nalunaarusiaq pineqartoq nassiuppaa, tassanilu Putinip siusinnerusukkut piumasaqaatitut oqaatigisimasai tunngaviatigut, tassanilu Ukrainemi sorsunnermut ukiut pingasut affarlu ingerlanerani pissutaasut naqissusersimavai.
Financial Timesimut taamak oqarput inuit pingasut paasissutissanik ilisimasaqartuusut.
Piumasaqaatit ilagaat, paasissutissiisut naapertorlugit, nunap immikkoortuinik Ruslandip piginnittuulernissaa akuerineqassasoq, Ukrainellu sakkutuui ikilisinneqarujussuassasut, aammalu Ukraine qaquguluunniit NATO-mut ilaasortanngussanngitsoq neriorsuutigineqassasoq.
USA-p nunanut allanut ministeriata, Marco Rubiop, aamma russit nunanut allanut ministeriata, Sergej Lavrovip, oqarasuaatikkut oqaloqatigiinnerisa kingorna Trumpip qullersaqarfianit ataatsimiinnissaq taamaatinneqarpoq.
Tusarfik ataaseq financial timesimut paasissutissiivoq, Rubiop Trumpimut oqaatigisimagaa, russit isumaqatigiinniarnissamut piumassuseqarnermik takussutissaqanngitsut.
Trumpip russit isummernerat nuannarinngilaa, tusarfik alla nutaarsiassaqartitsivimmut oqarpoq.
Oktoberip 20-iani russit nunanut allanut ministeriaqarfiat nalunaarpoq, Rubio aamma Lavrov oqarasuaatikkut oqaloqatigiittut ataatsimiinnissap piareersarneranut tunngasumik. Ministeriaqarfiup oqaloqatigiinneq pitsaasutut taavaa.
Ullut marluk qaangiummata Trumpip Putinimik ataatsimeeqateqarnissani piffissaligaanngitsumik kinguartippaa.
- Asulersuaq ataatsimiinnianngilanga , Trump aviisiliortunut det hvide hus-imi oqarpoq.
Ulloq taanna aamma USA-p Ruslandip uuliasiorfiutai anginerpaat marluk pillaammik akitsuutitigut qaffaaffigerujussuarpai.
Trumpip uppernarsanngilaa, Putinimik ataatsimeeqateqarnissaq taamaativinneqarnersoq.
Kreml-imi Russit naalakkersuisoqarfiinit tallimanngornermi ualikkut nalunaarutigineqarpoq, tusagassiorfiit ataatsimiinnissap taamaatinnissaanik allaaserisaat upperineqassanngitsut, taamaallaat USA-p aamma Ruslandip pisortatigoortumik malinnaaviginnittoqassasoq, Reuters allappoq.
