Tusarniaaneq: Uku nalunaarasuartaateqarnissamut salliutinneqassapput
Pissutsini immikkut ittuni attaveqaatit killeqalissagaluarpata nalunaarasuartaateqarnissamut inuiaqatigiinni pingaaruteqartut salliunneqartariaqarput, nalunaarummi nutaami tusarniaassutigineqaqqammersumi tamanna atuarneqarsinnaavoq.
Toqqorsivimmit assi: Leiff Josefsen
Ullumikkut kikkut nalunaarasuartaatinut attaveqassanersut Tusassip immikkoortissinnaanngilaa. Tamanna aaqqinneqarsinnaassasoq nalunaarummi nutaami siunnersuutigineqarpoq, assersuutigalugu attaveqaatit aserorneqarpata atuisut tamarmik datamik pisariaqartitaat matussuserneqarsinnaajunnaassappat.
Inuiaqatigiinni pingaarutilinnik suliaqarneq navianartorsiortinneqannginniassammat kikkut nalunaarasuartaatinut attaveqassanersut, pissutsini immikkut ittuni Nalunaarasuartaateqarnermi Aqutsisoqarfiup aalajangersinnaassavaa.
Marlunnik immikkoortoqassasoq
Ajornartoorneq pingaarnersiuisoqarnissaanik pisariaqartitsinertalik marlunnik immikkoortoqassasoq, nalunaarummi nutaami ilisimatitsissutaavoq.
- Inuunermik qulakkeerinninnissamut kiisalu oqartussat ajornartoornermi aqutsinissaasa aallartinneqarnissaannut pingaaruteqarlutik inuiaqatigiinni pisariaqavissunik sisamanik immikkoortumi siullermi Tusass pingaarnersiuissaaq, allassimavoq.
Inuiaqatigiinni pisariaqavissut pingaarnersiorneqartut aallaavittut tassaapput:
- Normut kallerisaariviit
- Politiit
- Illersornissaqarfik
- Peqqinnissaqarfik
Taassuma kingorna Nalunaarasuartaateqarnermi Aqutsisoqarfik Tusassip ilisimatissavaa, pisorlu immikkoortoq 2-mut pissalluni.
Immikkoortoq 2
- Pisoq tunuliaqutaralugu immikkoortoq 2-mi Nalunaarasuartaateqarnermi Aqutsisoqarfik pingaarnersiuineq pillugu aalajangiissaaq. Pisoq apeqqutaatillugu Nalunaarasuartaateqarnermi Aqutsisoqarfiup assersuutigalugu tulliuttut pingaarnersiorsinnaavai: timmisartut imarsiortullu attaveqarnerat angalanerallu, KNR radio aamma TV, innaallagissamik, imermik, kiammillu pilersuiviit, oqarasuaatinik angallattagaqarneq, innuttaasunik eqqugaasinnaasunik kommunit nakkutiginninnerat, aningaaseriviit nerisassaarniarfinnilu akiliisarfiit, ilisimatitsissutaavoq.
"Illoqarfiit nunaqarfiillu akornanni, nunallu avataanut attaviit ikittuinnaammata", Kalaallit Nunaanni nalunaarasuartaatitigut attaviit eqqugaasinnaasut naqissuserneqarpoq.
- Ilutigisaanik silarlutsillugu attaviit eqqorneqarsinnaasarput. Taamaalilluni nalunaarasuartaatitigut attavinnik atuinermi sivikinnerusumik imaluunniit sivisunerusumik killeqaratarsinnaanngikkuni attaveeruttarsinnaavoq, allassimavoq.
Tusarniaanermut killigititaq
Nalunaarummi nutaami siunnersuut tusarniaassutigineqarpoq, isummersornissamullu killigititaq tassaavoq oktobarip qulingat.
