Tusass 67 millionit koruuninik ukiup affaani siullermi angusaqarpoq

Namminersorlutik Oqartussat attaveqaqatigiinnermut allakkerinermullu ingerlatsiviat Tusass akileraarutit suli ilanngaatiginagit 67 millionit koruuninik ukiup affaani siullermi angusaqarpoq. Angusat piffissamut tassunga sanilliullugit appasinnerulaarput 74 millionit koruuninik siorna angusaqartoqarsimavoq.

Kaaviiaartitat 400 million koruuninik inerneqarput, 1 procentimik qaffariaateqarlutik.

Tusass nittartakkamini nalunaaruteqarpoq ukiup qaammataani arfinilinni siullerni sanaartornermut, 104,8 million koruuninik aningaasaliissuteqarsimalluni. 48,7 million koruuninik siorna piffissami tamatumani aningaasaliissuteqarsimavoq.

Tusassip naatsorsuutigaa akileraarutit suli ilanngaatiginagit 130-140 millionit koruuninik ukiumi naatsorsuusiorfiusumi 2026-mi angusaqassalluni, tassa 2025-mi akileraarutit suli ilanngaatiginagit, 179,5 millionit koruuninik angusaqarsimanermit 40-50 millionit koruuninik appasinnerusumik.

Tusass siorna piffissamut tassunga sanilliullugu ukiup affaani siullermi angusarissaarnerunngikkaluarluni, suliffeqarfik suli aningaasaqarnikkut ingerlalluartoq aningaasaqarnermut pisortaq Line Mika Skov oqarpoq :

- Aningaasaqarnermik patajaatsumik Ukiuni arlalinni ingerlatsivugut, tamannalu nukittuffik maanna periusissiungasumik anguniakkatsinnik piviusunngortitsiniarluta atorparput. Ilutigalugu akitigut nalimmassaanerit ukioq manna ingerlatagut siunissami kaaviiaartitanut sunniuteqassasut naatsorsuutigaarput.

- Ineriartorneq tamanna malillugu pilersaarusiorpugut aningaasatigullu nammassinnaallugu. Taamaattumik attaveqaasersuutitigut annertuumik aningaasaliisinnaavugut aamma periusissiornermi suliniutit pingaarnerit ingerlassinnaallugit, aningaasaqarnermi pisortaq Line Mika Skov taama oqarpoq.