Tusassi Kivitsisa suleqatigalugu ilinniartitsissutinik nutaanik saqqummersitsivoq
Coding Classi atuartitsissutaavoq, atuartut nutaaliorlutik kodelerinermik ilinniartinnissaannut tunngassuteqartoq. Tusassip kommunillu arlallit akornanni suleqatigiinnerup annertusarneqarneranut atatillugu, maanna nuna tamakkerlugu atuarfinni Coding Classimik atuartitsinerup ingerlateqqinnissaa atuutilivinnissaalu sulissutigineqarpoq.
Foto: Tusass
Tusassi Kivitsisa suleqatigalugu videolianik ilinniartitsissutinik nutaanik saqqummersitsivoq. Videoliat nutaat maanna Kivitsisa Akademimi, atuarfinni nittartakkatigut suliaqarfimmi pissarsiarineqarsinnaalerput.
Ilinniartitsissutit, atuarfinnut immikkut atortussiat, Coding Classimik ilinniartitsisunut piareersaatitut piginnaasanillu pilersitsinissamut atorneqassapput, ulluinnarnilu atuartitsinermi toqqaannartumik atorneqarsinnaassallutik.
Coding Classi atuarfiup suliffeqarfiullu akornanni suleqatigiissutaavoq, taamaattumillu Kivitsisamik suleqateqarneq ineriartorfiuvoq pissusissamisoortoq, Tusass nittartakkamini allappoq.
- Tusassip Coding Classi iluaqutigalugu atuarfinni kodelerinermik ineriartortitsineq nukittorsarpaa. Tamanna pingaaruteqarpoq pissanganarlunilu. Suleqatigiinneq pitsaasoq iluaqutigalugu, Tusassip suliniutaa annertooq, ilinniartitsissutillu pissanganartut ilinniartitsisunut atuartunullu suli amerlanerusunut, Kivitsisa Akademiikkut anngunnissaat periarfissaalerpoq. Tamatuma malinnaaviginissaa qilanaaraarput, Kivitsisami programminik aqutsisoq, Rune Nydam Bundgaard, oqarpoq.
Pikkorissaatinut pioreersunut ilassutitut atorneqassapput
Videoliat ilinniartitsissutit nutaat atuarfinni ilinniartitsisunut Coding Classi pillugu tunngaviusumik paasititsissapput, tamatumalu saniatigut Tusassimi pikkorissaatinut pioreersunut ilassutitut atorneqassallutik. Ilinniaritsissutit ilinniartitsisut atuartuutitik peqatigalugit nuannersumik ilikkagaqarnartumillu, nutaaliorlutik spillinik ineriartortitsinissaannut aqqutissiuussisussatut ilusilersorneqarsimapput.
Nivi Thomassen Olsen, Ilinniartitsinermut siunnersorti Tusassimilu Coding Classimi ilinniartitsisoq neriuppoq ilinniartitsissutit tigulluarneqarumaartut:
- Suleqatigiinneq una ilinniartitsissutillu nutaat iluaqutigalugit, Coding Classi meeqqat atuarfiini ilinniartitsisunut amerlanerusunut apuussinnaalerparput. Tamanna ilinniartitsisunut, atuartuutiminni teknikkikkut piginnaasanik ineriartortitserusuttunut isumassaarsiutaassaaq, kiisalu teknologii nutaaliornerlu iluaqutigalugit pilersitserusussutsimik nukittorsaassalluni. Neriuutigaarput ilinniartitsissutit tigulluarneqarumaartut, meeqqallu atuarfiini naleqarluartumik isumalluutaalerumaartut.
