Tusilartut nunatsinni sullinneqarnerat pitsaanerujussuusinnaavoq

Kalaallit Nunaanni innuttaasunut tusilartunut atugassarititaasut qanoq ittuuppat, aamma qanoq periarfissaqarpat innuttaqatiminnut tusilanngitsunut sanilliullugu?

Nunani avannarlerni tusilartut Nordisk Rådiat, sapaatip akunnerata naanerani Nuummi ataatsimiinneranni oqaatigineqarpoq Kalaallit Nunaat "angusinngitsuungajassimasoq" tusilartunut atugassarititaasunut tunngatillugu pitsanngorsaataasussanik paamaarussinini pillugu:

- FN-ip inuit innarluutillit pillugit ataatsimiititaliarsuata Kalaallit Nunaannik, Savalimmiunik aamma Danmarkimik misissuinertik naammasseqqammerpaat, tassani misissorneqarpoq, nunat FN-ip inuit innarluutillit pillugit isumaqatigiissutaanik malinninnersut. Angusinngitsuungajalluinnarput! Kalaallit Nunaanni tusilartut oqartussaasunut attaveqarnissamut periarfissaqanngillat. Tamanna annilaarnarluinnarpoq – aaqqiissutissaqarporli, Danske Døves Landsforbundip siulittaasua, Anne Vikkelsø oqarpoq.

Inuit innarluutillit pillugit oqaaseqartartoq Anja Hynne Nielsen imatut oqarpoq:

- Inuit tusilartut tunngaviulluinnartumik pisinnaatitaaffiisa qulakkeernissai eqqarsaatigalugit Kalaallit Nunaat kinguarsimavoq. Kalaallit Nunaat tusilartunut siunnersorteqarunnaarnikuuvoq, tusilartunut atuarfeqanngilaq, ussersornermut ilinniarfeqanngilaq imaluunniit naammaginartumik nutserisoqarnissamut periarfissaqarani. Ukiuni kingullerni toqqaannartumik kinguariartortoqarnikuuvoq – tamannalu FN-imi inuit innarluutillit pillugit ataatsimiititaliarsuup malugaa, ilallugulu: 

- Inissisimaffik kiserliulersitsivoq mattussillunilu. Tamatuma aamma kinguneraa, ikinnerusut ilinnialersarnerat, ikinnerusut suliffeqalersarnerat – amerlanerusullu nunamut allamut nuuttarnerat.

Neriulluartumik aaqqissuussineq fjerntolkning suli piviusunngorsimanngilaq

Nalunaarusiami suliassaqarfiit ilaat immikkut isornartorsiorneqartoq, tassaavoq avataanit nutserisoqarneq. 

Ussersorluni avataanit nutserineq nunarpassuarni tusilartut, oqarasuaatikkut oqartussaasunut attaveqarniartillutik atugarisarpaat.

AAMMA ATUARUK

Fjerntolkning af tegnsprog er klar

FN-ip Kalaallit Nunaannut isornartorsiutigaa, tusilartunut oqartussaasunut attaveqarnissamut avataanit nutserisoqarnissamut peqanngimmat. 

Kalaallit Nunaat tamakkerlugu maannakkut ussersorluni nutserisoq, tusilartunut nutserisuusinnaasoq ataasiinnaavoq.

Tamanna isumaqarpoq, tusilartutut periarfissaqanngimmat assersuutigalugu kommunimut, napparsimavimmut, akileraaruseriffimmut, politiinut imaluunniit oqartussaasunut allarpassuarnut sianernissamut. 

FN-ip inuit innarluutillit pillugit ataatsimiitsitaliarsuata innersuussutigaa, tusilartunut ulloq unnuarlu 24 tiimit sapaatip akunneranut ullut 7-it avataanit nutserisussamik piareersimasoqartassasoq, oqartussaasunullu tamanut sianernissamut periarfissaqassasoq.

Kajumissaarut: Kalaallit Nunaanni innuttaasut tusilartut Danmarkimi ungasianiit nutserunneqarsinnaanermut kiffartuussinermut ilanngutsinneqarlik

Danmarkimi ussersornermik nutserisorpassuupput, kalaallillu tusilartut tamangajammik qallunaatut ussersuutinik ussersortarlutillu paasisinnaapput, taamaattumik kalaallit tusilartut Danmarkimi avataanit nutserunneqartarnissaat tulluassaaq. 

Attavinitsittariaqarput tusilartunut internettikkut attavimmut aningaasartuutitigut kalluaanngitsumik. Tusilartunut internettimut kiisalu teknologiimi periarfissanut nutaanut attaveqarneq ulluinnarnik naligiinnerusunik pilersitsissaaq. Internetti inunnut innarluutilinnut taartisianik pilersitseqataasarpoq, tusilartut attaveqarnissaannut periarfissanik nutaanik ammaasarami.

DNR, KTK aamma Tilioq neriupput, Naalakkersuisut akisussaasuusut suliassaqarfik misissussagaat. 

- Kalaallinut tusilartunut, eqimattaasunut amerlanngitsunut, mianerisarialinnut avissaartinneqarsimasunut periarfissaasariaqarpoq ingerlataqarfinnut tamanut sianersinnaanissaq, avataanit nutserisumik atuinikkut,” taama oqarpoq Lisa Nielsen, KTK-mi siulittaasoq, nangillunilu: 

- Ilumoorsinnaanngilaq, Kalaallit Nunaanni nunatut innuttaasukitsutut naalakkersuisoqarfiit ingerlataqarfiillu akornanni suleqatigiissinnaannginnerput. Maanna inuit innarluutillit pillugit ataatsimiititaliarsuup isornartorsiutai innersuussutaalu allaganngorlugit pigilerpagut, neriuppugullu, Naalakkersuisut akisussaasuusut ajornartorsiutinik aaqqiinissamut suleqatigiumassagaatigut, taamaasillutik tusilartut oqartussaasunut pisariaqartitaminnut attaveqarnissamut periarfissaqalissammata.

Sermitsiamit Naalakkersuisunut oqaaseqaammik pissarsiniarluta sulissuteqarpugut.