PINNGORTITALERIFFIK
Tuttut sungaartunik qungasequsikkat aallaanagit
Tuttumik sungaartumik qungasequsikkamik naammattuuiguit aallaassanngilat. Taamak Pinngortitaleriffik Facebookikkut nalunaaruteqarpoq. Tuttut nikittarneri qanorlu ingerlaartarneri ukiuni tulliuttuni tallimani malinnaaffiginiarlutigit, Pinngortitaleriffik Kangerlussuup Sisimiullu eqqaanni tuttut 40-ut GPS-imut attavilikkanik apriilimi qungasequsersuivoq.
Foto: Grønlands Naturinstitut
Maannakkorpiaq tuttut 40-ut qungasequsersukkat tuttullu 38-it siutaasigut nalunaaqutsikkat nunap timaaneerujoorput.
Tuttut qungasequtaat siutaanilu nalunaaquttat, tuttut nikittarneri qanorlu ingerlaartarneri ukiuni tulliuttuni tallimani malinnaaffiginerisigut ukiup qanoq ilinerani tuttut sumiittarnersut ilisimasaqarfigineqalissaaq. Ingerlaartarnerilu qanoq sunniuteqartarnersut paasisaqarfiginiarneqarpoq.
Nunami aput, sermeq, kissassuseq nillissuserlu tuttumut qanoq sunniuteqartarnersoq paasiniarneqarpoq.
Nerisaat nunalu qanoq assigiinngiiaartigisunik naasoqartiginersoq aamma paasiniarneqarpoq.
Inuit, snescooterit angallatillu allat qanoq angalatigineri aamma paasiniarneqarpoq.
Aallaaneqassanngillat
Norralik qungasequtilik norraalu sapinngisamik ukiuni tallimani uumasariaqarmata aallaannginnissaat Pinngortitaleriffiup kissaatigaa.
- Tuttu qungasequtilik pisarisuussagukku, qungasequtaa siuai alliit imaluunniit alleroq tunniussiuk nassiulluguluunniit.
Tuttut 38-ut siutimikkut nalunaaqutsersukkat
Pinngortitaleriffik aamma tuttunut 38-nut siutaatigut nalunaaqutsersuivoq, taakku qungasequteqanngillat.
Taakku peqqissusaat, nerisaat, timikkut qanoq issusaat iluminnersorluuniit misissorneqassapput.
Pisarisoorukku
- Siutimigut nalunaaqutsikkamik pisaqaruit toqungasumilluunniit naammattuuiguit nalunaaqutaa, siuai alliit, allerua, tuttup sumiiffigisimasaanut ilanngullugit nassiutikkit tunniullugilluunniit. Tuttu siutimigut nalunaaqutsigaq takugukku normualu atuarsinnaallugu, normua tuttullu sumiiffia allallugu nassiukkiuk uunga tuttu@natur.gl.
