Tysklandip illersornissamut ministeria Kalaallit Nunaannut tikeraarniarluni pilersaaruteqarpoq

Tysklandip illersornissamut ministeriata Boris Pistoriasip suleqatigini danski Troels Lund Poulsen (V) peqatigalugu septembarimi Kalaallit Nunaat tikeraarniarlugu pilersaaruteqarpoq.

Tyskit nutaarsiassaqartitsivia DPA tyskillu tusagassiorfii arlallit taamatut allapput.

- Kalaallit Nunaat takujumagakku tapersersuinerpullu takutikkusukkakku, Tagesspiel naapertorlugu Pistorius oqarpoq:

DPA naapertorlugu taanna isumaqarpoq Atlantikup avannaani Issittumilu takussaanissaq pingaaruteqartoq.

Tysklandip illersornissamut ministeriata ataasinngormat Københavnimi Troels Lund Poulsen ataatsimeeqatigigamiuk tikeraarsinnaanermut periardissaq eqqartorpaat.

Illersornissamut ministeriaqarfik naapertorlugu nunap silaannartaani illersornissaq, imaani isumannaallisaanissaq illersornissamullu tunngatillugu suleqatigiinnerup nukittorsarneqarnissaa oqaluuserineqarput.

Danmarkip Tyskland, Canada Norgelu Atlantikup avannaani imaatigut isumannaallisaanermut tunngatillugu sapaatip-akunnerani kingullermi suleqatigiilersippai.

Siusinnerusukkut nalunaarutigineqarpoq nunat taakku ilaatigut sungiusaaneq sungiusarnerillu kiisalu illersornissamut atortunik pisineq pillugit suleqatigiittussaasut.

Pistoriusip Danmarkip illersornissamut ministeria Kalaallit Nunaannut tikeraaqatigippagut, ukioq manna Europami politikkerit nunarsuarmi qeqertat annersaannut aatsaat tikeraartoqassanngilaq.

Sapaatit-akunneri marluinnaat matuma siorna Frankrigip præsidentia Emmanuel Macron aamma Kalaallit Nunaannut tikeraarpoq.

Tikeraarneranut atatillugu tusagassiortunik katersortitsinermi Macronip aamma Danmarki kalaallillu inuiaat tapersersorniarlugit nalunaaruteqarpoq.

USA-p præsidentiata Donald Trumpip arlaleriarluni Kalaallit Nunaannik aqutsinissamik soqutiginninnini ersersimmaguli nunarsuarmiut soqutiginninnerat annertunerulerpoq.

Ukioq manna siusinnerusukkut USA-p vicepræsidentia J.D. Vance aamma Pituffimmi Amerikamiut sakkutooqarfianni, Kalaallit Nunaanniittumi, tikeraallatsiarpoq.

USA-p Kalaallit Nunaannik aqutsilersinnaanera Kalaallit Nunaata Danmarkillu kissaatiginngilaat.

/ritzau/