Ukiut qulit kingorna: Tasiilami meeqqat affangajaat kommunimit suli suliassaqarfigineqarput

Tasiilami Alivarpi ataasinngornerup ullaap tungaani iserfigaarput. Atuarfiup ilua kamippaqarfiunngimmat kamippagut peeratsigit allaanngilaq angerlarsimaffimmut isiinnarluni. Atuartitsineq aallartereermat atuartuni 315-iusuni amerlanngitsuinnaat naapitassaapput.

Arnaq tikilluaqqusisorput tassaavoq Miriam Vang. Allaffiata tungaanukarnitsinni atuartut naapitagut tunumiusut oqaluuttarpai. Miriam savalimmiormiuusoq ukiut sisamassaani pisortatut atorfeqarpoq.

Allaffianut iseratta isernitsinniit suna tamarmi allaanerujussuartut misinnarsivoq, eqqartugassagummi imaannaanngillat.

Tasiilaq ukiut qulit ingerlaneranni allanngorsimaqaaq. Innuttaasut ikilinikuunerisa kingunerisaanik meeqqat aamma ikilinikuupput. Kisitsisilli aalajangersimasut suli nikissimanngillat: Illoqarfimmi meeqqat affaat kommunip isumaginnittoqarfianit suli suliassaqarfigineqarput.

Meeqqat 1.000-it missaaniittut akornanni 477-it kommunip isumaginnittoqarfianit 2015-imi suliassaqarfigineqarput. Meeqqat maanna 560-iupput, 2025-milu aggustimi kisitsisit qiviaraanni 274-it suliassaqarfigineqartut takuneqarsinnaavoq. Procentinngoraanni nikittoqangaarsimanngilaq, tassa 50 procentit tungaanut suli suliassaqarfigineqarput.

- Tusarlugu assut alianarpoq, Miriam kisitsisit pillugit qanoq qisuariarnersoq aperigatsinni nipaatsumik taama akivoq.

- Atuarfimminngaanniit nalunaaruterpassuarnik (kommunimut aaqq.) anngussisarpugut. Ukioq atuarfiusoq 2023/24 katillugit 45-nik nalunaaruteqarpugut, ukiorlu atuarfiusoq 2024/25 54-inik nalunaaruteqarluta. Meeraq ernumagigutsigu nalunaarnissarput pisussaaffigaarput. Sakkortusisamik nalunaaruteqartussaatitaavugut.

Atuartitsineq isumassuinerlu

Meeqqat affaasa kommunimit suliassaqarfigineqarnerat atuarfimmi malugineqartarpoq.

- Ajornartorsiut angisuujusoq nalunngilarput, taamaammat pisinnaasagut tamaasa atorlugit meeqqat ikiorniartarpagut, Miriam oqarpoq.

Naak meeqqat ikortariallit pillugit annertuumik iliuuseqartaraluarlutik atuarfiup atuarfittut ingerlanissaa pingaartittuaannarlugu Miriamip erseqqissaatigaa. Atuartummi kommunimit suliassaqarfigineqanngitsut pisussaaffitsik malillugu atuartittussaavaat.

- Killissagut ilisimasariaqarpagut. Atuarfiuvugut. Atuartitsisussaavugut. Meeqqat isumassorlugillu toqqissisimatittussaavagut, kisianni isumaginnittoqarfiunngilagut, Miriam oqarpoq.

Isumaginninnermut siunnersortit marluk imaluunniit tarnip pissusaanik ilisimasalik ataaseq atorfeqartussatut akuerisaapput. Naak isumaginninnermik siunnersortimik ataatsimik atorfeqartoqareeraluartoq tarnip pissusaanik ilisimasalimmik atorfinitsitsinissamik akuerisaasimallutik Miriam oqaluttuarpoq. Suli atorfinitsitsisimanngillat, piukkunnarsinnaasumilli oqaloqateqarlutik erseqqissaavoq.

- Meeqqap inersimasumik ikinnerpaamik ataatsimik tatigisaqarsinnaanissaa pingaaruteqarpoq, Miriam oqarpoq.

Illoqarfik tamakkerluni aliasukkaangat

Ajornartorsiutip ilaa imminut toquttartut amerlanerinit aallaaveqarpoq. Ajornartorsiut ilisimaneqarluareersoq pillugu oqalulerami Miriam eqqarsarpasilluni nipaattumik oqaluppoq. 

- Imminut toquttut amerlasarput, imminullu toquttoqarsimatillugu ilaqutaasunut qimataasunut kinguneqarnerlorujussuartarpoq, Miriam oqarpoq.

- Meerartagut sunnertittaqaat. Imaassinnaasormi angajoqqaavisa arlaat, qatanngutaat ajaalluunniit imminut toqussimasoq. Kingunerlutsitsisoqartaqaaq. Meeqqat isumaginiartarpagut, kisianni inersimasut avatangiisaat ikorfartueqataasussaagaluartut aliasuttorujussuusarput.

Aliasuttoqartillugu inini atuartitsiviusuni anitsiarfinniluunniit meeqqat qanoq pissusilersorsinnaasarnerat oqaluttuaraa.

- Ilaanni meeqqat qiarujussuartut ganngini naammattoortarpagut, ilaannilu sooq qianerlutik nalusarpaat. Misigissuserpassuilli atortarpaat.

Septembarip aallaqqaataa sussaanngilaq

Tasiilami inuuniarnikkut ajornartorsiutit piffissap ilaani ersarinnerusarput.

- Septembarip aallaqqaataa meerartatsinnut sussaanngilaq, Miriam oqarpoq sikillunilu.

Ullormi taanna akissarsisoqarlunilu akileraarpallaarsimasut utertoorput.

Susoqarami?

- Nuanninngitsorpassuarnik pisoqarpoq. Politiit ulapeqaat, ulapikkaangatalu uagut aamma ulapittarpugut.

Ilinniartitsisut ulluni taamaattuni atuartitsissutissaraluatik tunulliukkallarlugit toqqissisimatitsinissartik pingaarnerutilertarpaat.

- Imaassinnaasoq pisuttuaqatigiillutilluunniit pinnguaatit aliikkutarigaat. Taamaattoqartillugumi meeqqanut toqqissisimatitsinissarput pingaarnerulertarpoq.

Akissarsiffiit nalaanni meeqqat toqqissisimajunnaartarput.

- Meerarpassuit aarleqqutissanittarput: ‘Angerlarumamita susoqassava?’ ‘Uagutsinnimita susoqarpa?’ ‘Angerlaruma inoqassanerluni angajoqqaakkaluunniit anisimassanerlutik?’ ‘Uagutsinni imertoqarnerluni?’, Miriam oqarpoq.

Suna tamarmi ajortuinnaanngilaq

Miriam pisut ilungersunartut eqqartulersillugit arriinnerusumik oqalulertartoq malunnarpoq. Naak inuuniarnikkut ajornartorsiutit inittortaraluartut ajunngitsorpassuaqartoq erseqqissaatigaa.

- Ilaqutariippassuaqarpoq meeqqaminnik paarsilluartunik. Taanna puigussanngilarput.

Naak akissarsinerit assigisaallu meerarpassuarnut toqqissisimajunnaartitsisaraluartut piffissat allat eqqissisimanarlutillu toqqissisimaffiusartut aamma oqaatigaa.

- Juulleriartornera meeqqat eqqissisimaffigisarpaat, tamatumami nalaani eqqissisimasoqartarpoq.

Naak meeqqat kommunimi suliassaqarfigineqaraluarlutik ilaat aamma ulluinnarni ajunngitsumik inooqataasartut oqaatigaa.

- Meeqqat atuartinnerini kommunip isumaginnittoqarfiani suliassatut isiginnginnissaat pingaaruteqarpoq. Allatullimi meeraapput. Meeraqarpoq aamma isumaginnittoqarfimmit suliassaqarfigineqaraluarlutik imminnut taama isiginngitsunik.

Sorpassuit nassuiaatissartaqaraluartut apeqqut ataaseq suli kaaverusaartuarpoq. Ukiut qulit qaangiussimalerput, meeqqallu affaat kommunimit suli suliassaqarfigineqarlutik.

Sooruna allanngortoqarsimanngitsoq?

- Atuarfimmi pisortatut maanna oqaluppunga, killissakkalu ilisimaqqissaartariaqarpakka. Atuarfiunerput puigussanngilarput, isumaginnittoqarfiunngilagut. BFA (Kommunimi Meeqqanut Ilaqutariinnullu Immikkoortortaqarfik, aaqq.) tamakkua pillugit oqaloqatigisariaqassavarsi, Miriam oqarpoq. 

Ilinniartitsisut tatituut

Atuarfik aappalaartoq takisuunillu torsuusarsualik Tasiilami illoqarfiup qiterpasissuaniittoq 59-inik sulisoqarpoq. Isumaginninnermik siunnersortip saniatigut ilinniartitsisut ilinniarsimasut 29-t sulipput. Meeqqanut nukarlernut ilinniartitsisut marluk timelærillu 18-it.

- Timelærigut nuannaarutigeqaagut. Kisianni aamma ilinniartitsisut tamarmik ilinniarsimasuunngitsut timelæreqarnitta takutiinnarpaa.

Miriamip atorfinnik nittarsaassiniarlutik Kitaanut Danmarkimullu ukiut tamaasa angalasarlutik oqaluttuaraa. Inuuniarnikkullu ajornartorsiutit ilinniartitsisunut atorfinitsinneqartunut isertuunneq ajorpaat.

- Ilinniartitsisussarsioraangatta tatituunik ujaasilluta nassuiaatigisarparput. Ilinniartitsisut meeqqanik sakkortuumik pissusilersortunik aqutsisinnaasariaqarput. Meeqqat akissarsiffiit nalaanni suna pisariaqartinneraat aamma maluginiarsinnaasariaqarpaat, Miriam oqarpoq.

Pilerilersitsinnaasunilli allanik aamma peqartoq erseqqissarpaa.

- Maani pinngortitarsuaq nalissaqanngilaq. Innuttaasut naapikkuminarluinnartuullutillu ikinngutitaartornaqaaq. Tikilluaqqusisaqimmata inuunerup sinneranut ikinngutit naapinneqartarput, Miriam oqarpoq.

Naak ajornartorsiuterpassuaqaraluartoq Miriam siunissamut isumalluarpoq.

- Angajoqqaat allanngortissinnaanngilagut, unneqqarilluni taama oqarpoq.

- Meeqqalli ilisimasaqalersillugit sapiissuseqalersillugillu atuartissinnaavagut. Ilinniagaqarsinnaagunik inooriaatsimik allanngortitsinissamut periarfissaqalersinnaapput.

Kisitsisit allaaserisami aallaavigineqartut aggustip naaneraneersuupput. Meeqqani 560-usuni 240-t suliassaqarfigineqalersut Kommuneqarfik Sermersuup Sermitsiamut oktobarip 22-ani nalunaarutigaa. Nunaqarfinni tallimaasuni meeqqat 249-t akornanni 78-it maanna suliassaqarfigineqarlutik. Imaappoq Tasiilami nunaqarfiinilu suliassat meeqqanut tunngasut katillugit maanna 318-upput.