Ukiut qulit suliffissarsiortutut nalunaarsorneqartut amerlassusaasa appariartorfii qaangiuttut, ineriartorneq maannakkut uninngaannalerpoq

2014-imi suliffissaaleqisut agguaqatigiissillugu 3.762-iupput, 2023-milu taamaallaat 1.290-iullutik. 

Sanaartornerujussuit soorlu inissialiornerit, atuarfiliornerit mittarfiliornerillu suliffissaaleqinerup taama appasitsigineranut pissutaanerpaapput.

Suli illoqarfinni anginerusuni suliffissaaleqineq appasissumiippoq, illoqarfiilli minnerusut aamma illoqarfiit ataasiakkaat annertunerusumik suliffissaaleqiffiullutik. Tamanna pingaartumik najukkani suliffissat amigaataanerannik pissuteqarpoq, nalunaarusiami allassimavoq.

Illoqarfiit ilaanni suliffissaaleqinerujussuaq "najukkani suliffeqarnermi aaqqissuussaanikkut ajornartorsiutinik allanik pissuteqarsinnaavoq, ilaatigummi aalisakkanik suliffissuarmut sulisartunik ilinniagaqarsimanngitsunik nunamut tikisitsisarneq takuneqarsinnaammat.".

Innuttaasut amerlanerusut suliffeqassapput

Utoqqaat amerliartornerat pissutigalugu utoqqarnik isumassuisut peqqinnissaqarfinnilu sulisut amerlanerusut pisariaqartinneqartut, nalunaarusiami erseqqissarneqarpoq.

- Tamatuma saniatigut inuusuttut amerlanerungaatsiartut ilinniakkamik naammassinnittariaqarput, "inuuneq naallugu ilinniarneq aamma piginnaasat akuerineqarnissaat sulisussanik nukittorsaaqataassasut" tikkuarneqarluni.

Naalakkersuisut Attassiinnarnissamut Ineriartornissamullu Pilersaarutaat 2-mi sakkussat assigiinngitsut nalunaarusiami innersuussutigineqarput.

- Siusinaartumik pensionisiallit nalilersoqqinneqassapput, suliap suussusaanut allanngortitsisinnaaneq eqaannerussaaq, suliffeqarneq assigiinngisitaarfiunerussaaq amerlanerillu inuussutissarsiornermi ilinniakkamik aallartitsissapput il.il. Innuttaasunut, inuussutissarsiortunut ilinniarfeqarfinnullu ujartuilluni ilitsersuinikkut attaviginnittoqarnissaannik iliuuseqarnerit tamakku isumaqarput. Tamanna suleriaaseq atorneqareerpoq, kisianni pitsaanerumik annertusarneqarsinnaalluni, naqissuserneqarpoq.

Utoqqaat amerlanerusut

Ukiuni kingullerni inuit agguataarnerisa ineriartornerat oqallisaangaatsiarluni sammineqarpoq.

- Kisianni kinguaariikkaanut inuiaqatigiit inissikkaanni, taava ajorpallaanngilaq. Ukiuni 2027-imiit 2037-ip tungaanut pisarnermiit amerlanerulaassapput. Taamaattumik iliuuseqajaartoqartariaqarpoq. Amerlanerusut utoqqaat illuanni sulilersinniarneqartariaqarput, nalunaarusiap eqikkarneqarnerani allassimavoq.

- Utoqqaat pillugit Naalakkersuisut periusissiaanni suliniutit piviusunngortinnissaat suliniutillu nassuiaataat pillugit pilersaaruteqarpoq. Tassani inatsisinik naleqqussaasoqassaaq, taamaalilluni inersimasunik ilinniartitsisarneq pillugu Namminersornerullutik Oqartussat nalunaarutaasa allanngorneratigut, sulinikkut misilittakkanik naliliiffigitinnertalimmik pikkorissaanerit aqqutigineqarnerulersinniarneqarput. Kisianni inatsisinik naleqqussaaneq kisimi aqqutigineqarsinnaanngilaq, erseqqissarneqarpoq.

Taamaattumik utoqqaat angerlarsimaffiini najugaqartariaqartut imaluunniit utoqqarnut neqeroorutigineqarsinnaasunik pisariaqartitsisut isumaginissaannut kommunit naammattunik sulisussaqarnissaminnik qulakkeerinninnissartik ajornartorsiutigaat.