Ukrainemi sorsunnerup unitsinnissaanut Trump Putinimut ullunik aqqaneq marlunnik periarfissiivoq
Utaqqeqqinnissamut pissutissaqanngilaq, siuariartortoqanngilaq, Ruslandip Ukrainellu eqqisseqatigiinnissaat pillugu Trump oqarpoq.
Trumpip julip aallartinnerani mianersoqqussutigaa Ruslandimut akitsuusiinernik annertuunik atuutilersitsissalluni, Ukraine-mi sorsunneq unitsinneqarnissaanut isumaqatigiissuteqartoqanngippat. 14. juulimi ulluliuteqqaagaa ullunik 50-nik sivisussuseqaraluarpoq.
Asseq (toqqorsivimmit): Jorge Silva/Reuters
Ruslandip præsidentiata Vladimir Putinip ullut quliniit aqqaneq marlut tungaanut periarfissaqarpoq Ukrainemi sorsunnerup unitsinnissaanut, Amerikami præsidentia Donald Trump oqarpoq.
Nutaarsiassaqartitsivik AFP allappoq.
Trumpip siusinnerusukkut juulip qaammataani mianersoqqussutigaa, Ruslandimut akitsuutinik annertuunik atuutilersitsisoqassasoq, Ukrainemi sorsunnerup unitsinnissaanut isumaqatigiissuteqartoqanngippat. Killiliussaq, juulip 14-iani aalajangiussaq, ullut 50-inik sivisussuseqaqqaaraluarpoq. Killiliussaq taanna pilersaarutaasoq malillugu septembarip 2-iani naasussaagaluarpoq.
- Ullut qulit imaluunniit aqqaneq marluk missaat ullumikkumiit killiliussaq nutaaq aalajangiuppara. Pissutissaqanngilaq utaqqinissatsinnut, siuariartortoqanngilaq takusinnaasatsinnik, Donald Trump, tuluit ministeriunerat Keir Starmer Scotlandimi ataatsimeeqatiginerani oqarpoq.
Amerikami præsidentip ataatsimiinnermi aamma oqaatigaa, "pakatsinartorujussuusoq" Putinip toqqagaa, tassalu Ukrainemi illoqarfinni inoqarfinnik silaannakkut saassussinermi sorsunneq ingerlateqqillugu.
- Inuit toqutaasut aqqusinerni suni tamaniipput, isumaqarpungalu tamanna iliuusissaanngilluinnartoq. Taamaammat takussavarput qanoq pisoqassanersoq.
- Præsident Putin oqaloqatigissallugu annertunerusumik soqutigiunnaarpara, Donald Trump Keir Starmer peqatigalugu ataatsimiinnermi nalaani oqarpoq.
Trumpip aamma narrujuummissutigaa Putinip, nammineerluni oqaatigisaa malillugu, sorsunnermi ileqqorissaarnissamut isumaqatigiissutit siornatigut isumaqatigiissutigisimasatik malinneqanngimmata.
- Isumaqaraluarpugut arlaleriarluta aalajangereersimalluta, taamaattorli præsident Putin aallartippoq Kyivimut qaartartorsuit aallartillugit, inuppassuillu, ilaatigut utoqqaat illuiniittut toqorarlugit, Trump oqarpoq.
Naatsorsuutigineqarpoq Keir Starmerip aamma Donald Trumpip oqaluuserissagaat Gazami sorsunneq kiisalu EU-p USA-llu akornanni niueqatigiinneq.
Ruslandip naalakkersuisui præsidentilu Putin suli akissuteqanngillat piffissaliussap sivikillineranut tunngatillugu imaluunniit præsident Trumpip Ukrainemi sorsunneq pillugu oqaasii allat pillugit.
