Ulloq qinersiffik ajornerpaaq

Erik Jensenip Siumumi siulittaasuujunnaarnerata kingorna allannguutinik pingasunik annertuunik iliuuseqartoqarpoq.

Siullertut partiimi nutaamik siulittaasoqalerpoq. Aappaattut – arnaavoq. Pingajuattut partiip Kalaallit Nunaanni politikimut nutaamik inissisimasumut akuliunnissaa. Angajutut inissisimanermiit nukatut inissisimasunngorluni. Tamanna ajornaatsuinnaagunanngilaq, piffissammi annersaani siuttutut tunuarsimaarnani atuuffiit annertuumik akisussaaffimmik paarsisut inissisimaffigineqartarsimapput.

Siumup ukiuni kingullerni siulittaasua qinersinermi qinersiseqarnerpaasimasoq tassaavoq Aleqa Hammond. Taanna 2013-imi qinersinermi 7.000-ingajannik taaneqarpoq. Tassa qinersinermi matumani Jens-Frederik Nielsenimit amerlanerungaatsiarluni.

Aleqa oqarasuaatikkut oqaloqatiginerani paasinarsivoq marlunngormat ajorsarneq nikalluutiginagu partiimi siulittaasunngortoq angusaqarluassasoq neriuutigalugulu upperaa.

- Uanga partiimi tassa arnani siullersaallunga siulittaasunngorpunga. Tamanna Siumumi nutaamik nukittorsaataavoq, isumaqarpungalu Vivian aamma taamaaliussasoq, oqarpoq, nangillunilu:

- Siumut partiini kisiartaalluni arnamik siuttoqarsinnaanera soqutiginarpoq.

- Sooruna Siumut ajorsartoq?

- Qinersisartut nutaamik misileerusussuseqarput. Politikikkut allanngornerit tamat oqartussaaqataanerannut iluaqutaasinnaapput, politikikkullu pissutsit ilaannikkut allanngortarput. Taava partiit neriorsuutitik tamaasa eqqortissinnaaneraat neriorsuutitillu piviusunngortissinnaaneraat takussavarput. Tamanna innuttaasunit malinnaavigineqarluassaaq, Aleqa Hammond akivoq.

- Siumut sinnerlugu qularuteqarpit?

- Isumalluartuuvunga, aamma taamaattuaannarnikuuvunga. Siumut partiiuvoq patajaatsoq erseqqissunik anguniagaqartoq. Inuiaqatigiinnit puiorneqanngilagut, Aleqa Hammond, ukiuni tallimani siulittaasuusimasoq, oqarpoq.

- Vivian sulilerpat aallaqqaataaneernissaq periarfissatsialaavoq. Suut iluatsilluarsimanerigut suullu annaasaqarfigisimanerivut eqqarsaatigeqqissaarnissaannut.

Partiimi avissaartuuttoqanngitsoq

Erik Jensen ikileriaateqarujussuarnermik paasineraniit ullualuit tamuareeraa AG-p oqaloqatigaa.

- Nassuerutigisariaqarpara partiimi aatsaat taama angusarlutsiginerput. Taamaa siuttuuneq allamut ingerlateqqippara, oqarpoq.

- Politikimiiginnassavit?

- Inatsisartunut qinigaavunga, qinersisima sullinnisssaannut pisussaaffeqarpunga. Inissisimaffiga nutaaq naammassissavara.

- Akisussaaffiup tigummiunnaarnera oqiliallaatigaajuk?

- Suliarisimasakka ajorinngilakka. Partiimi ataqatigiilluarneq pilersissimavara. Partiimi avissaartuuttoqarunnaarpoq.

Aki-Matilda sunniuteqaangaatsiartoq Erik Jensenip nassuerutigaa. Partiimi nuannarineqarnerpaat ilaat qinersisoqarnissaa sioqqullugu Naleqqami ilaasortanngorpoq.

– Soorunami angusatsinnut ajoqutaavoq, oqarpoq.

- Aquutip paariunnaarnera aliasuutigaajuk?

- Aaqqissuusseqqinnerit oqaluttuarisaanermut ilannguttut kinguaariinni iluaqutaasussat suliaraavut, tamannali uannut akisuvoq. Isumaqarpunga uanga – aamma partii – sapiissuseqarluta iliuuseqartugut, Erik Jensen akivoq.

- Qinersinermi ajorsarnissinnut suna pissutaava?

- Aalisakkanik pisassiissutit tamakkiisumik inuiaqatigiinnit pigineqartalernissaat aamma nunaqarfinnut mikinerusunut iluaqutaanissaa aalisarnermut inatsisip siunertaa pillugu innuttaasunut paasititsiniutiginissaa pikkoriffigivallaarsimanngilarput.

- Aammattaaq aaqqissuusseqqinnerit sunniutaat pitsaasut innuttaasunit suli malugineqarsinnaannginnerat unammilligassat ilagaat, qineqqusaarnermilu ineqarnermut akiliutit qaffanneqarnissaat assigisaallu pillugit oqaaseqartoqarsimavoq.

- Qallunaat tusagassiorfiini namminiilivinnissamut isumaga allanngorsimasutut oqaatigineqarnera aamma uggoraara. Isummakkali allanngortinngilakka. Inatsisartuni malittarisassat aalajangersimasut malinneqartarnerat innersuussutigisimavara, qinersisoqartillugulu aalajangiiffigisassatut siunnersuutit qinersinerup kingornanut kinguartinneqartartut, Erik Jensen oqarpoq. 

Eqqarsaqqinnissamut piffissanngorpoq

Siumumik pilersitseqataasup Lars-Emil Johansenip ukiorpassuarni misilittagaqarnini pissutigalugu politikimi qummut ammullu ingerlasoqartarnera nalunngilaa. Qinersisartorpassuilli taama amerlatigisut tapersersuiunnaarneqat allat assigalugit tupaallaatigaa. Imminut isornartorsiortoqartariaqalersoq nalilerpaa.

- Inuttut suliffimmiluunniit kukkussutit nassuerutiginngikkaanni aaqqinneqarsinnaaneq ajorput.

- Sumi kukkusoqarsimasoq takusinnaaviuk?

- Inuiaqatigiit aningaasaqarnerannut pingaaruteqarluinnartumik aalajangiisoqartillugu innuttaasut tusarnaarneqarneq ajorput peqataatinneqarnatilluunniit. Partiit inuit isumaat tusaanngitsoorsinnaanngilaat. Innuttaasut oqartussaaqataaneranni innuttaasut aalajangiisarput. Ima paasinagu inuit isumaat malillugit iliuuseqartuaannartoqartariaqartoq, kisianni suliassani annertuuni soorlu aalisarnermut inatsimmi takornariaqarnermullu inatsimmi inuit inatsisinik piginneqataasutut misigitinniarlugit siulersorluartariaqarput, Lars-Emil Johansen oqarpoq, nangillunilu:

- Isertitatta 95 procentii aalisarnermit pissarsiaraagut.

Lars-Emil Johansenip nassuerutigaa kingumut qiviarneq “ajornanngilluinnartoq”, naalakkersuisooqatigiillu pitsaanerpaamik siunertaqarlutik ilungersunartunik aalajangiisariaqarsimasut.

- Attaveqarsinnaaneq aamma tassani pineqarpoq. Assersuutigalugu namminiilivinnissaq pillugu oqallittoqartillugu namminiilivinnissaq qanoq aningaasalersorneqassanersoq oqaatigineqanngitsoorsinnaanngilaq. Namminiilerutta inuussutissarsiuteqartariaqarpugut, soorunamilu qinersisartut atugarissaarnerup ajorseriannginnissaa aningaasalersorneqarnissaalu akissutiserusuppaat.

- Vivian Motzfeldtip aqutsilernera iluarisimaarpasippat?

- Taanaappoq. Maannali pingaarnerpaavoq qinersisartut aalajangiinerat tusaaneqarnissaa. Inatsisartunut ilaasortaatitatta affaat sinnerlugit ikileriarput, taamaattumik nalilersuisoqartariaqarpoq, Lars-Emil Johansen akivoq.