Ulloq unnuarlu nalunaarusiaq: Illoqarfinni arlalinni tillinniartoqartoq

Ullup ataatsip ingerlanerani tillinniarnerit tillinniariarnerillu tallimat Kalaallit Nunaanni Politiinut nalunaarutigineqarsimapput.

Nuummi, Qaqortumi Tasiilamilu tillinniarnerit pingasut politiinut ataasinngornermi novembarip aqqarnganni nalunaarutigineqarput. Nuummi napparsimmavimmi Tasiilamilu kantiinami tillinniartoqarsimasoq allassimavoq, Qaqortumili sumut tillinniartoqarnersoq nalunaarusiami allassimanngitsoq Kalaallit Nunaanni Politiiniit paasissutissiipput.

- Suliat taakku pingasut politiinit misissorneqarput. Suliani pasisaqanngilagut, Kalaallit Nunaanni Politiini pigaartut pisortaat Aputsiaq Hansen Sermitsiamut oqarpoq.

Tillinniartoqarnerani nakuusertoqartoq

Ataasinngormalli ualikkut allami ajortoqaqqippoq. Angerlarsimaffimmut tillinniartoqartoq ataasinngornermi nalunaaqutaq 16.07 politiit nalunaarfigineqarput.

- Tillinniat Nuup illoqarfiata ilaani Nuussuarmi suli angerlarsimaffimmiittut, pigisanillu suli tillinniartut nalunaarutigineqarpoq. Politiit sumiiffimmut ornigukkamik inuk ataaseq tigusaraat, misissuisoqarneranilu inuit marluk kingusinnerusukkut tigusarineqarput killisiorneqarlutillu, Aputsiaq Hansen oqarpoq.

Tillinniat tillinniarnerminni nakuusersimasut misissuinermi paasineqarpoq. Nakuuserlutik tillinniarsimasutut unnerluutigineqarput, pigaartut pisortaat oqarpoq.

Tillinniariaraluarnerit

Tillinniarnerit taakku sisamat politiit maanna misissuiffigisaasa saniatigut Nuuk Centerimi marlunngornerup unnuaani tillinniartunut ornigupput. Nal. 02.24 politiit nalunaarfigineqarput.

- Inuit pingasut Nuuk Centerimut tillinniariaraluarput. Taakku pingasut ukiukitsuupput. Inuk ataaseq tillinniariaraluarsimasutut unnerluutigineqarpoq, Aputsiaq Hansen oqarpoq.

Qinngorpumi biilimik assartuummik ataasinngornermi unnukkut qulip missaani ikuallattoqarneranut Kalaallit Nunaanni Politiit aamma ornigupput. Ikuallanneq qaminneqarpallappoq, politiillu paasissutissaataat naapertorlugit ikuallattoqarnerani ajoqusertoqanngilaq.