Ulloq unnuarlu nalunaarusiaq: Lastbiilit kussinermut nakkartut
Nuussuup Qinngorpullu aqqutaani lastbiilit pingasunngormat unnukkut ajutoorput. Aquttoq ajunngilaq, nalaatsornerinnakkullu ajutoortoqarsimasoq politiit naliliipput.
Kalaallit Nunaanni Politiit aqqusinermi ajutoortoqarneranut ornigupput, lastbiilit Nuummi kussinermut nakkarsimammata.
Leiff Josefsen
Kalaallit Nunaanni Politiinut unnuaq eqqissisimasimavoq. Kalaallit Nunaanni Politiit pigaartuisa pisortaat taamatut nalunaarpoq.
Taamaakkaluartoq taasariaqartunik pisoqarsimavoq. Nuussuup Qinngorpullu aqqutaani lastbiilit ajutoortut pillugit pingasunngormat unnukkut nalunaaqutaq 20.35 Kalaallit Nunaanni Politiit nalunaarfigineqarput.
- Kisimiilluni ajutoorneruvoq, tassani lastbiilit kussinermut nakkarsimallutik. Qujanartumik inunnik ajoqusertoqanngilaq. Kalaallit Nunaanni Politiit pisoq misissorsimavaat suliarlu maanna naammassineqareerpoq, Kalaallit Nunaanni Politiini pigaartut pisortaat Jørgen Madsen Sermitsiamut oqarpoq.
Inissiami annikitsumik ikuallattoqartoq
Ullormi tamatumani siusinnerusukkut, pingasunngornermi juulip 24-anni nalunaaqutaq 16.08, politiit aamma nalunaarfigineqarput.
- Nuussuarmi inissiami annikitsumik ikuallattoqarpoq. Aamma inunnik ajoqusertoqanngilaq. Takusinnaasakka naapertorlugit qatserisartut ikuallaffimmut ornigussimapput, soorunamilu ikuallanneq qamillugu, Jørgen Madsen oqarpoq.
