Ulloq unnuarlu nalunaarusiaq: Politiit unnuaq ulapaartut

Politiit arfininngornerup unnuaani nakuusernerit aalakoortullu pillugit suliaqangaatsiarput.

Kalaallit Nunaanni Politiit unnuaq ulappupput.

Assi: Oscar Scott Carl

Hanna Hviid Hanna Hviid Hanna Hviid Journalisti

Saqqummersinneqarpoq 27. Septembari 2025 - 10:28

Annonse

Kalaallit Nunaanni Politiit unnuaq immikkut ittumik ulapingaatsiarsimapput. Inuit aalakoortut pillugit suliat arlallit nakuusertoqarsimaneralu pillugu suliaq ataasiinnaanngitsoq orniguffigisariaqarsimavaat.

Kalaallit Nunaanni Politiini pigaartoq Heini Jacobsen taama oqaluttuarpoq.

Unnuaq nalunaaqutaq marlunnut Aasianni nakuusertoqarneranik nalunaaruteqartoqarpoq. Angut tillunneqarsimavoq. Paasiniaaneq suli ingerlanneqarpoq.

Tasiilami angut unatarneqarsimasoq pillugu nalunaaqutaq ataatsit missaani assingusumik nalunaaruteqartoqarpoq. Politiillu pinerliisoq suli ujaaraat.

Ullaaq manna nalunaaqutaq 06.00 Nuummi inissiami eqqissiviilliortoqarneranik nalunaaruteqartoqarpoq. Kalaallit Nunaanni Politiit angut aallaaseqartoq nassaaraat. Aallaasoqarsimanngilaq, angullu politiit tigusarineqarpoq.

- Unnuaq ulapaarfiungaatsiarpoq. Nalinginnaasumit ulapaarfiunerulluni, Heini Jacobsen oqarpoq.