Ullormut nalunaarusiaq: Politiit suliani marlunni ilisimannittunik ujaasipput
Kalaallit Nunaanni Politiit unnuaq marloriarlutik naluanaarfigineqarput, sulianullu taakkununnga tunngatillugu paasissutissaateqarsinnaasut tusarfigineqarusupput.
Ilulissani politiit qimmilerlutik marlunngornermi ualikkut misissuinerminni inuk hashinik paarsalik nassaaraat.
Assi: Kalaallit Nunaanni Politiit
Inuusuttut arlallit Sisimiuni ATV-nik marlunnik angalaartut Kalaallit Nunaanni Politiit unnuaq nalunaaqutaq 04.33 saaffigineqarput.
Nalunaartup paasissutissiinera naapertorlugu inuusuttut 18-it ataallugit ukioqannguatsiarput. Politiit sumiiffimmut ornigummata ATV-nik aquttut politiinit qimaapput, taakkulu malersorneqarlutik.
Politiit ATV-t aappaat nassaaraat, aquttuali imaluunniit ilaasui sumiiffimmiit qimaapput.
- Taamaattumik qimaanerannik takunnissimasinnaasunik ilisarinnissimasinnaasunilluunniit ujaasivugut, politiinit Aputsiaq Hansen oqarpoq.
Biilit kussinermiittut hasheerniarlu
Nanortalimmi politiit takunnissimasunik aamma ujartuipput. Biilit kussinermiittut pillugit nalunaaqutaq 01.09 politiit nalunaarfigineqarput.
Biilit ikumapput inuttaqaratilli. Aallarunneqarsimanissaat ilimatsaanneqarpoq.
- Biilit assartuutit tillinneqarsimapput. Tamatumunngalu atatillugu takunnissimasinnaasunik ujarlerpugut, Aputsiaq Hansen oqarpoq.
Ilulissani politiit qimmilerlutik misissuisartut inummik pasinarsinnaasumik ippassaq ualikkut naammattuuipput. Inuk politiit misissuiffigigamikku hashimik aningaasanillu paarisaqartoq paasivaat.
- Politiit qimmiata ikiaroornartoqarsinnaanera pillugu qisuariarpoq. Inuk pasitsaanneqartoq misissorneqarmat hashimik aningaasanillu paarsaqartoq paasineqarpoq, ingerlaannarlu unnerluutigineqarluni, pigaartut pisortaat oqarpoq.
