Ulluni arfineq-marlunni angerlarsimaffeqanngitsoq: Uisitsivoq

Angerlarsimaffeqanngitsuulluni qanoq innersoq amerlanerpaasugut eqqarsaatigisarsimassavarput. Ingammik Issittumi ukiukkut issilluartillugu.

Inuk Højgaardip tamanna aamma eqqarsaatigisarsimavaa. Nunatsinnili kisiartaagunarluni angerlarsimaffeqanngitsuuneq misilinniarlugu aalajangersimavoq.

Assiliissutini, sinngup puua alapernaassutsinilu, nammineq oqarneratuut arlaleriarluni peqqissimititsisartoq, nassarlugit ataasinngornermi unnukkut iniminiit anivoq.

- Immaqa qaammat ataaseq eqqarsaatigaara. Sulillunga qiiakujuppunga, tassanilu eqqarsalerpunga angerlarsimaffeqanngitsut ingammik ukiukkut qanoq ittarnersut, misilikkusulerparalu, Inuk Højgaard oqaluttuarpoq.

Innaallagissiortutut ilinniarsimasuuvoq, maannali kilisaammi sulinerusarpoq. Nuummi Nuussuarmi aappanilu najugaqarput.

Eqqarsarnera inuiaqatigiit naqqarlertaanni inuulluni misiliinissaanik kinguneqarpoq, aallaqqaammullu angerlarsimaffeqanngitsumik ’ilisimasortarisinnaasaminik’ ujaaseqqaarniaraluarpoq.

- Nassaanngilanga. Taava sumukassanerlunga, sumi sinissanerlunga qanorlu iliussanerlunga nalullugu aniinnarpunga, oqaluttuarpoq.

Inuk Højgaardip aalajangernini pillugu anaanani suliffinilu oqaluttuuppai. Aningaasaatini atorniarnagit aamma aalajangersimavoq. Siunertaa: Angerlarsimaffeqanngitsutut sapaatip-akunnerani inuuneq. Minnerpaamik.

Ataasinngornerup unnukkuani biilimimnut matuersaatit anaanaminut tunniukkiartorlugit anivoq. Arnaata qungaseqummik atukkerpaa.

- Anaanaga ajorsuaarpoq, tapersersorpaangali. Meeraallungali alapernaatsuullungalu uteriitsuujuaannarnikuuvunga. Tamanna pigereerpara. Anaanannguakkuluga, ilaannikkut eqqarsartarpunga, oqarpoq.

Inuk Højgaardip aamma qanoq innersoq timilu qanoq qisuariassanersoq paasiniarlugu ulluni tallimani nerinani misilinnikuuaa. Misileraanini Youtubemi kanalimi Fias-imi takuneqarsinnaanngorlugit.

Ilisimasaqanngitsoq

Inuk qungasequtserluni illoqarfiup qeqqanukarpoq angerlarsimaffeqanngitsunillu ujaasilluni.

- Angerlarsimaffeqanngitsumik ikiuussinnaasumik naapitsissallunga neriukkaluarpunga. Naapitsinngilangali. Kisimiivippunga kialaarfiillu pillugit ilisimasaqarnanga, aamma Frelsens Hæri pillugu ilisimasaqanngilanga, oqarpoq.

Sila nillerlunilu qulisimagami nittaalaarpoq. Issisiut qerilerfiup arfineq-pingasunillu issinnerata nalaaniippoq. Inuup Hans Egedemik inuusaliamukarluni Nuuk qimerloorpaa. Najugaqarfia Nuuk. Maani peroriartorpoq. Aqquserngit tarrajullutillu igalaat juullerpaluttuni qullilersorsimallutillu ullorialersorsimammata illoqarfik misigittaatsutut ippoq. Inuup illoqarfiup taamaannera maluginiarsimanngisaannarpaa. Piffissaq tupinnaannartumik arreeqaaq.

- Akunnerit marlukkaarlugit sumiiffimmi aalajangersimasumiissinnaasarpunga. Taava qiianarsisarpoq. Kissanniarlunga timera tamaat patittarlugulu pississaartarpunga. Taava pisuttarpunga. Arlaanni unikkallartarlunga. Imminut pattaqqeriarlunga tullianut ingerlaqqittarpunga, Inuk Højgaard oqaluttuarpoq.

Inuunini tamaat timersortarsimagaluarluni kanaani arriitsumik sukakkiartortut malugisinnaavaa.

Inuk Højgaard kissanniarluni illoqarfimmi inissiat assigiinngitsut majuartarfeqarfianukartarpoq.

- Inunnik naapitsinaveersaavissorpunga. Utoqqatsisutut assut misigaanga. Inuit takugaangaminnga tupattarput, soorlu tassa ajoquserniarikka, Inuk Højgaard oqaluttuarpoq.

Inuup unnuk siulleq inini sanioqqukkamiuk tunniutiinnarpoq.

- Kialaamut iserusunnera nererusunneralu akiorsinnaanngilakka. Imerusussuaarpunga, Inuk Højgaard oqaluttuarpoq.

Inuup iserami nillataartitsivik ammariarlugu imeruersaat eqiiallannartoq State aarlorutaasaannarpaa. Aah, iluaq, imerusukkunnaarami nillataartitsivik matuaa. Ullaassakkut sisamanngorpoq.

- Angerlarluni nuanneraluaqisoq tunniutiinnarama imminut ajoreqaanga. Imminut ajortuliorfigisimasutut misigaanga, oqarpoq.

Aqagua. Marlunngorneq nalunaaqutaq 22:00.

- Aneqqippunga. Tamatumuuna angerlaqqinniarnani aalajangiusimavoq, oqarpoq.

Inuk timersortarfissuup Inussiviup eqqaani illuaqqamik nassaarpoq. Illuaraq naleqquteqqissaarpoq. Inoqanngilaq, aamma biileqanngilaq.

- Paarnaarsinnaannginnera unammillernarpoq. Unnuk taanna sinngup puunni sinngusarpunga, itisuumilli sinissinnaanngilanga, sunalu TAMAAT tusaavara. Arpallunga qimaariaannaajuaannarpunga, Inuk Højgaard oqaluttuarpoq.

Ullaakkut arfineq-marlunngormat Inuk makippoq. Ileqquusumik kaffisorsinnaanani pisuttuarniarluni aalajangerpoq.

Kialaarnissaq pingaarnerpaavoq

Pisuttarami Nuup qeqqani Frelsens Hæri tikippaa. Inuit taqqamaniittut qanoq amerlatigineri Inuup tupaallaatigaa. Aallaqqaammut tunuarsimaarlunilu immikkoorpoq. Inunnilli ullup ingerlanerani oqaloqateqallattaalerpoq. Angerlarsimaffeqanngitsutut misiliinini ammasumik eqqartorpaa.

- Arlallit imminnut oqaluttuarisarput. Oqaloqateqarnissaminnik tusarnaarneqarnissaminnillu, minnerunngitsumillu paasineqarnissaminnik pisariaqartitsisut ingerlaannaq malugisinnaavara, Inuk Højgaard oqaluttuarpoq.

Inuup ulluni taakkunani angerlarsimaffeqanngitsut akornaniinnermini qanoq imminnut ikiorlutillu tapersersoqatigiitsiginersut maluginiarpaa. Pikkoriffigaallu.

- Nukittoqalutillu inutsialassuupput, soorunalumi aamma ilai kamassaqaqaat. Paasineqarnissartik taamaallaat pisariaqartikkaat isumaqarpunga. Inuiaqatigiit naqqani inooreeraluarlutik inuiaqatigiinniit ajattorneqarput, oqaluttuarpoq.

Inuk Kialaarfiup saavani utaqqisunut ilaavoq. Akunnerni 25-ni nerisimanngilaq, tamannali soqutaanngilaq. Kialaartumiinnissarmi pingaarneruvoq.

- Allat soqutaajunnaartarput. Kialaarfissaqarnissaq pingaarnerpaanngortarpoq, allaanngitsut, oqarpoq.

Inuk najugaqarami Kialaarfimmut isernissaminut itigartitaavoq. Ullut tulliuttut arfinillit aqqusinermi inuuvoq. Timersortarfissuup eqqaani illuaqqami imaluunniit Nuummi Nuussuarmiluunniit inissiat majuartarfeqarfiini sinittarpoq.

- Ullut tamarmik assigiinngitsorujussuupput. Arfininngorneq ajornerpaavoq, sunami tamarmi matoqqavoq. Ulloq naallugu silamiippunga, anorlerporlu. Majuartarfeqarfinni sininniaraluarpunga, anorili siorsuaannarmat sinissinnaanngilanga. Ulloq taanna sininngilanga, Inuk Højgaard oqaluttuarpoq.

Inuulluaqqusineq tussunngunartoq

Inuk angerlarsimaffeqanngitsut ilagalugit katersortarfimmiippoq. Tamanut ullaakkorsiuteqarpoq. Rundstykkit manniillu. Pitsaanerusinnaanngilaq.

- Nerereeraangamik tussiutinik erinarsoqatigiittarput. Nalinginnaasumik erinarsorneq ajoraluarpunga. Tassanerpiarli qanoq nakussannartigisoq malugisinnaavara. Inuit angerlarsimaffeqanngitsut ilaasa isikkui killitsinnaqaat. Soorlu tassa anniaataat isaani takusinnaagikka, angerlarsimaffeqanngitsuuneq akiorniartuagaat, Inuk Højgaard oqarpoq.

Sapaammi angerlarpoq. Arnaa Frelsens Hærimi utaqqivoq. Inuk apuummat eqipput.

- Anaanaga qiavoq. Ernumasimaqaaq. Arlaanniit aniguisutut misigaanga. Ikinngutitaama inuulluaqqunissaat tussunngunarpoq, pulaartarniarlugillu neriorsorpakka, oqarpoq.

Inuk Nuussuarmut pisulluni angerlarpoq. Pisunniarluni aalajangernikuuvoq. Pisulluni aallarnikuugami pisulluni aamma angerlassaaq. Angerlarnerani ikinngutaasa tapersersuinertik ersersinniarlugu biilinik sanioqqullutik siggarfigisarpaat.

- Angerlarnera killitsinnaqaaq. Anaanaga ikinngutikkalu ilagalugit anaananni ullaakkorsiorpugut. Ingerlammata eqqisisinnaanngilanga. Soorlu tassa silaannaarutilerluni. Timera sillimaannaavippoq, ippassaammat sininnikuunngikkaluarlunga unnukkut sinissinnaanngilanga, Inuk Højgaard oqarpoq.

Misigisaa uisitsivoq.

- Qanoq qaammaasakitsigisugut paasilerpara. Angerlarsimaffeqanngitsut kamaattussaanngilagut. Arlallit angerlarsimaffeqanngitsut suliffittaartariaqarnerannik angerlarsimaffeqannginnertillu nammineq pisuussutiginerannik oqartut tusartarnikuuakka. Ilaanulli nalaatsornerinnaanngitsoq paasinikuuara. Inoqateqarpugummi taamak inuuneqarusunngikkaluarlutik ilaatigut adresseqannginnertik pissutigalugu sapertunik. Inissisimaffiannik paasinninnerusariaqarpugut, Inuk Højgaard oqarpoq.

Inuup sapaatip-akunnera aqqusinermi inooreerluni angerlarami aappani neriniartarfimmut qaaqquaa.

- Tassanngaannaq qullikka kuulerput. Sooq qissasernerlunga iluamik ilisimanngilara. Misiginneqatigigunarpakka, qimannerallu sakkortuvoq. Tappiissimaqaanga, maannali uisinneqarpunga, Inuk Højgaard naqissusiivoq.

Inuk unnukkorsioreerami nerisassanik neriniartarfinneersunik qaaliivilluni anivoq. Nunarsuarmut – isumaa malillugu – inunnik paasineqarusullutillu akuerineqarusuttunik ulikkaartumut.